2,5 metrlik adamnyń súıegi tabyldy

ASTANA. QazAqparat - Tájikstannyń Hatlon oblysy Farhor aýdanynda arheologtar 10 metr tereńdikten 2,5 metrlik adamnyń súıegin tapty dep habarlaıdy nurotau.kz. Moladan sondaı-aq, Býddanyń músinderi de tabylǵan.

Zertteý júrgizip jatqan ǵalymdardyń aıtýynsha, máıittiń basynda táji jáne janynda qylyshy jáne mystan jasalǵan aınasy bolǵan. Arheologtar molany kóne qalashyq ornynda eki aıdan beri júrgizilip jatqan qazba jumystarynyń barysynda taýypty.

Farhor aýdany mýzeıiniń dırektory Azızýllo Muratovtyń aıtýynsha, tabylǵan súıek Tájikstannyń ǵylym akademııasyna zertteý úshin jiberilgen. Munda onyń qaı kezeńge tıesili ekeni anyqtalady.

Ǵalymdardyń sózine sensek, 2,5 metrlik adam óz zamanynda qurmetti jaýynger nemese qolbasshy bolǵan. Onyń janynan tabylǵan jádigerler osynyń aıǵaǵy deıdi olar. Al moladan shyqqan Býdda músinderi - qazirgi Tájikstan aýmaǵynda býddızmniń órkendegeniniń aıǵaǵy. Arheologtardyń aıtýynsha, músinderdiń jasalý kezeńi bizdiń zamanymyzǵa deıingi ýaqytqa tıesili.