2,3 mlrd teńge salyq tólemegen bıznesmen Abylaı Gabjalılovqa úkim shyqty
ALMATY. QazAqparat - Almatyda bıznesmen Abylaı Ǵabjalılovqa qatysty sot úkimi shyqty. Sot otyrysy qylmystyq ister jónindegi Almaly aýdandyq sotynda ótti, dep habarlaıdy QazAqparat tilshisi.
«Araltuz» AQ-nyń burynǵy top-menedjeri Abylaı Ǵabjalılovtyń ustalǵany jaıly byltyr aqpanda belgili bolǵan edi.
Kásipkerdiń ústinen kómirdi jetkizý kezinde salyqty tólemeý faktisi boıynsha qylmystyq is qozǵalǵan. Zań buzýshylyqtar 2011-2012 jyldar aralyǵynda jasalǵan.
Іs materıaldaryna sáıkes, Abylaı Ǵabjalılov jalǵan tulǵalardyń atyna ózine baǵynatyn 5 seriktestik ashqan. Tórt seriktestiktiń jumysyn baqylaý úshin «Evrazııa Kómir Treıd» JShS-ny quryp, onyń dırektory retinde ózin bekitken. Bas býhgalter retinde sottalýshy Bımaǵambetovany taǵaıyndaǵan.
Óz kezeginde Bımaǵambetova salyqtan jaltarý maqsatynda kómir saýdasynan túsken tabysty bastapqy býhgalterlik qujattarǵa, kassalyq kitapqa tirkemegen. Kiris jáne shyǵys orderlerin toltyrmaǵan.
«Esep qujatyna seriktestikterdiń qarjylyq jáne sharýashylyq qyzmeti týraly jalǵan aqparat engizilgen. Osylaısha sottalýshylar 1 mlrd 566 mln 459 myń 674 teńge kóleminde korporatıvtik tabys salyǵy men 764 mln 576 myń 425 teńge kóleminde qosymsha qun salyǵyn tólemegen», - delingen úkimde.
Sot Abylaı Ǵabjalılovty QR QK-niń 222-baby 3-bóligimen (Mekemeden bıýdjet esebine salyqtar men ózge de mindetti tólemderdi aýdarýdan jaltarý) aıypty dep tanyp, 4 jyl 8 aıǵa bas bostandyǵynan aıyrý týraly sheshim shyǵardy.
Sonymen qatar, zattyq aıǵaq retinde tárkilengen 540 myń 750 AQSh dollary men 163 myń 80 teńge memleket menshigine aýdaryldy.
Aıta keteıik, Abylaı Ǵabjalılov QR QK 235-baby (Bir nemese birneshe qylmysty jasaý maqsatynda qylmystyq topty qurý, basshylyq etý jáne oǵan qatysý) boıynsha taǵylǵan aıyptan aqtaldy.
