«1WIN» onlaın-kazıno uıymdastyrýshylaryna halyqaralyq izdeý jarııalandy
QMA Almaty oblysy boıynsha departamenti Qazaqstan, TMD jáne alys shet el aýmaǵynda jumys istegen «1WIN» onlaın-kazınosynyń zańsyz qyzmetine qatysty sotqa deıingi tergeý júrgizip jatyr, dep habarlaıdy Kazinform.
Qarjylyq monıtorıng agenttigi baspasóz qyzmetiniń málimetinshe, onlaın-platforma zańsyz oıyn bıznesin uıymdastyrýmen qatar myńdaǵan otandastarymyzdy tartyp, tıisti lıtsenzııasyz býkmekerlik qyzmet kórsetken.
Aqshalaı qarajat ınternet-ekvaırıng arqyly aýtentıfıkatsııasyz qabyldanǵan, bul tipti kámeletke tolmaǵandarǵa da qumar oıyndarǵa qatysýǵa múmkindik berdi.
2023 jyldyń ózinde-aq onlaın-kazıno aınalymy shamamen 4 mlrd teńge bolǵan. Qazir tergeý jalǵasyp jatyr. Onlaın-kazıno saıty buǵattaldy, tórt uıymdastyrýshyǵa halyqaralyq izdeý jarııalandy. Tárkilenýge jatatyn múlikke jáne jalpy somasy 1,5 mlrd teńge aqshalaı qarajatqa tyıym salyndy. Sondaı-aq «Mercedes-Maybach S500» jáne «Lamborghini Huracan» avtokólikteri tárkilendi.
QR QPK-niń 201-babyna sáıkes ózge de aqparat jarııa etilýge jatpaıdy.
Qarjylyq monıtorıng agenttigi Qazaqstan zańnamasyna sáıkes elde onlaın-kazıno qyzmetine tyıym salynǵanyn, al býkmekerlik qyzmetter tıisti lıtsenzııa bolǵan jaǵdaıda ǵana kórsetiletinin eskertti.
«Agenttiktiń «AFM Insider» telegram-botyna ekonomıkalyq quqyq buzýshylyq faktileri týraly habarlaýyńyzǵa bolatynyn esterińizge salamyz», - delingen habarlamada.
