1 mlrd teńge únemdeldi: Qorǵanys salasyndaǵy tsıfrlandyrý jańa deńgeıde
ASTANA. KAZINFORM — Bıyl elimizde 42 myń azamat áskerge shaqyrylǵan. Al sonyń teń jartysy kúzgi áskerge shaqyrtý maýsymynda áskerı qyzmetke attanyp jatyr.
Qorǵanys salasynyń mamandary memlekettik qaýipsizdik qyzmetiniń, shekara qyzmetiniń jáne Tótenshe jaǵdaılar mınıstrligin jas kadrlarmen tolyqtyrylyp bolǵanyn aıtady. Qazirgi ýaqytta qarýly kúshterdi jas sarbazdarmen jasaqtaý júrip jatyr. Al qarasha aıynyń sońynan jeltoqsan bitkenge deıin Ulttyq ulan jas áskerılermen tolyqtyrylmaq.
Qazir áskerge tirkeý, shaqyrtý júıesi edáýir ózgergen. Endi 17 jasqa tolǵan azamattar burynǵydaı qyrýar qaǵaz arqalap, áskerı komıssarıattyń tabaldyryǵyn tozdyrmaıdy. Sebebi, endi qorǵanys salasynda «Smart Voenkomat» tsıfrlyq júıesi jumys istep tur.
— Aldynǵy jyldan bastap azamattardy tirkeýdi proaktıvti túrge aýystyrdyq. ıAǵnı qazir azamattardy áskerge tirkeý jumystary avtomatty túrde azamattardyń aralasýynsyz júredi. Olar ózderi tirkelgeni týraly da bilmeıdi. Biraq e-Gov-qa kirip, óziniń jeke kabınetinen kóre alady. Buryn mektep pen kolledjde oqıtyn 17 jasqa tolǵan oqýshylardy alǵashqy áskerı daıyndyq pániniń muǵalimi jınap, áskerı komıssarıatqa alyp keletin. Ol kezde tirkeý tek qańtar-aqpan aılarynda júretin. Al qazir jyl 12 aı tirkeý toqtaýsyz júrip turady. Mysaly, shildede bala 17 jasqa tolsa, proaktıvti túrde tirkelgen bolyp esepteledi, — deıdi QR Qorǵanys mınıstriniń orynbasary Darhan Ahmedıev Kazinform tilshisine bergen suhbatynda.
Tsıfrlyq jobanyń arqasynda sala mamandary memleket qarjysyn mıllıardtap únemdegen.
— Bul júıe memleketke 1 mıllıardtan astam qarajat únemdeýge múmkindik berdi. Ol qalaı? Birinshiden biz avtobýstardy jalǵa almaımyz. Jas jigitterdi munda alyp kelmeımiz, olar 24 anyqtama qujattardy jınamaıdy. Soǵan qaramastan bizge qajetti barlyq jumys tolyq oryndalyp otyr. Biz bıyl 9 aıdyń ishinde 500 myń azamatty proaktıvti túrde tirkedik. Kóktemgi áskerge shaqyrtýda 350 myń stýdent kelmeıdi. Kúzgi áskerge shaqyrtýda taǵy 350 myń stýdent kelmeıdi. 120-170 myńǵa deıingi 17 jastaǵy azamattar kelmeıdi. Bárin qosqanda jalpy 1 mlnnan astam azamat osy júıe arqyly avtomatty túrde tirkelip, qyzmetin alyp jatyr. Soǵan sáıkes, qajetsiz áýre-sarsańǵa da túspeı, ýaqyttaryn únemdep otyr, — deıdi mınıstrdiń orynbasary.
Jańa júıe, áskerge jaramaıtyn azamattardy avtomatty túrde anyqtaı alady.
— Buryn áskerı komıssarıattar 18-27 jastaǵy barlyq azamatqa áskerge shaqyrtý qaǵazyn beretin. Al qazir shaqyrtýdy SMS arqyly jiberemiz. Biraq bárine emes. Mysaly, JOO oqyp jatqan stýdentterge «oqyp jatqandyqtan áskerden bosatylasyz, biraq akademııalyq demalys alyp, áskerı mindetińizdi óteýge bolady» degen habarlama jiberemiz. Odan bólek, naýqas, múgedek, úılengen, balaly azamattar da shaqyrtý almaıdy. ıAǵnı biz naqty áskerge barýǵa jaraıtyn adamdarǵa ǵana shaqyrtý jiberemiz. Bul bizdiń jáne azamattardyń ýaqytyn únemdep otyr. Buryn olar bizge habarlasyp, túrli qujattardy jınap, áskerge jaramsyz ekenin dáleldeıtin. Júıe arqyly biz áskerı qyzmetshilerimizdi artyq jumystan bosatyp otyrmyz, — deıdi maman.
«Smart Voenkomat» júıesi azamattardyń tirkelgen áskerı komıssarıatyn da proaktıvti túrde aýystyrady.
— Eger azamat turǵylyqty mekenjaıyn aýystyrar bolsa, bir áskerı komıssarıattan shyǵyp, ózge birine tirkeý de avtomatty túrde júrgiziledi. Odan bólek, ár kadr bólimsheleri áskerı komıssarıatqa ár aı, ár toqsan saıyn esep beretin. Bul esepterdi de qazir avtomatty túrde ózimiz alyp otyramyz. Qazir olar bizge eshqandaı artyq qujat jibermeıdi, — deıdi Darhan Ahmedıev.
Qorǵanys mınıstriniń orynbasary jańa joba jumys ónimdiligin aıtarlyqtaı arttyrǵanyn jetkizdi.
— Qazir avtomatty júıege kóshkennen keıin buryn sol jumystardy atqarǵan mamandardyń jumysy jeńildedi ǵoı. Sodan keıin birinshi másele sol qyzmetshilerdi qysqartý bolǵan. Eger ol qanshama ýaqytyn osy jumystarǵa arnaıtyn bolsa, qazir ol jumystardy alyp tastasaq, endi ol azamattardy qysqartaıyq, bıýdjetti únemdeıik degen usynys aıtyldy. Biraq áskerı komıssarıatqa kelip, mamandardyń jumysyn baqylaǵannan keıin mundaǵy jumystyń sapasy artqanyn kórip otyrmyz. ıAǵnı, bizdiń qyzmetshilerimiz tańerteńnen keshke deıin basyn kótere almaıtyn. Negizgi jumystaryna ýaqyty jetpeı, osyndaı tirlikterge kóp ýaqyt qurtatyn. Al qazir jumystyń sapasy artty dep aıtýǵa bolady, — deıdi ol.
Bul júıe Densaýlyq saqtaý, Eńbek jáne áleýmettik qorǵaý, Іshki ister mınıstrldigimen ıntegratsııalanǵan. Oǵan qosa azamattyń áskerge ketkeni týraly habar bankterge de jiberiledi. Demek nesıe alǵan azamat áskerge ketken soń týysqandaryna anyqtama qaǵazyn alyp, bankke barýdyń qajeti joq. Bul jumystardyń bári avtomatty túrde júrgiziledi. Sondaı-aq DS mınıstrliginiń bazasymen biriktirilgen «e-Medosmotr» aqparattyq júıesi de jumys istep tur. Sol arqyly áskerge shaqyrtylǵan azamattyń densaýlyǵy týraly barlyq aqparatty birden alýǵa bolady. Qorǵanys salasynyń mamandary pılottyq joba Astana, Shymkent qalalary men Qaraǵandy oblysynyń Abaı qalasynda tekserýden sátti ótkenin aıtady.
Aıta keteıik, Qorǵanys mınıstrligi tsıfrlyq júıeler áskerı qyzmetke shaqyrýdyń barlyq negizgi kezeńderin jeńildetkenin málimdedi.