1999 jyly satylyp ketken Ulttyq ulanǵa tıesili jer memleket menshigine qaıtaryldy
ASTANA. KAZINFORM — Shymkent garnızonynyń áskerı prokýratýrasy Ulttyq ulannyń áskerı bólimine bekitilgen, aýmaǵy 86 gektardan asatyn jer ýchaskesiniń 1999 jyly kommertsııalyq qurylymnyń paıdasyna zańsyz ıelikten shyǵarylǵanyn anyqtady.
Áskerı prokýrorlar áskerı múliktiń maqsatty paıdalanylýyn qamtamasyz etý boıynsha júıeli jumysty jalǵastyryp keledi.
— Qorǵanys maqsatyndaǵy jerlerdiń paıdalanylý zańdylyǵyn taldaý barysynda Shymkent garnızonynyń áskerı prokýratýrasy Ulttyq ulannyń áskerı bólimine bekitilgen, aýmaǵy 86 gektardan asatyn jer ýchaskesiniń 1999 jyly kommertsııalyq qurylymnyń paıdasyna zańsyz ıelikten shyǵarylǵanyn anyqtady. Keıin bul jer birneshe ret jeke tulǵalarǵa qaıta satylǵan, — delingen Bas áskerı prokýratýra habarlamasynda.
Prokýrorlyq qadaǵalaý aktisi negizinde áskerı bólim jer ýchaskesine qatysty satyp alý-satý sharttaryn jaramsyz dep taný týraly talappen sotqa júgindi.
Talap aryz qanaǵattandyrylyp, jerdi memlekettik menshikke qaıtarý rásimi bastaldy.
Aıta ketelik Oralda jeke menshikke berilgen jer 14 jyldan keıin memleketke qaıtarylǵany týraly jazǵan edik.