1998 jyly Astananyń tusaýkeserinde qandaı maqalalar jarııalandy - baspasózge sholý
«Egemen Qazaqstan» gazetinde Astana kúniniń tuńǵysh ret atap ótilýine baılanysty 12 maýsymda jarııalanǵan «Elorda kúlli álemge tanylǵan kún» atty maqalada 10 maýsymda bas qalanyń ortalyq alańynda gala-kontsert uıymdastyrylǵany jazylady. Aýqymdy sharalar legi alaman báıgege ulasqan. 25 shaqyrymdyq alaman báıgede ózgelerden oq boıy ozyp kelgen jambyldyq shabandoz Ernur Tórequlovqa Nursultan Nazarbaevtyń ózi bas júlde -«Toıota» avtokóliginiń kiltin tabys etken.
Alaman báıgeni tamashalaǵan halyq budan keıin kúreske aǵylǵan. Qazaqstannyń túkpir-túkpirinen kelgen som bilek balýandardyń arasynan Sálken Jartybaev túıe balýan atanǵan.
«Shortandy tasjolynyń boıynda jańadan turǵyzylǵan ıppodromǵa jınalǵan qaraqurym halyqtan kóz súringendeı edi. Jaǵalaı tigilgen kıiz úıler, sap túzegen saýda qatarlary - bári-bári búgin tek toı úshin, toıǵa álemniń túkpir-túkpirinen jınalǵan halyq úshin qyzmet istep jatty. Teńge ilýde atbasarlyq Janaıdar Aýshaqıev jeńimpaz atandy. Tusaýkeser kúngi dýmannyń sońy merekelik sherý men karnavalǵa ulasty. Dúbirli meıram Astananyń bas dańǵyly Respýblıka jáne Kenesary kóshesiniń boıynan bastaý aldy. Sherýdiń alǵy shebindegi sarbazdar orkestriniń ekpindi dabyly kósheni jaǵalaı tamashalap turǵan jurtshylyqtyń delebesin qozdyra túskendeı. Astananyń kontserttik alańdarynda Qazaqstannyń ǵana emes, TMD men álemdik estrada juldyzdary óner kórsetti. Bul rette áıgili «Modern Tolkıng» tobyn, ataqty ıtalıan ánshisi Toto Kýtýnıony, sondaı-aq Anna Veskı, Fılıpp Kırkorov, Roza Rymbaeva, Laıma Vaıkýle jáne basqalardy atap ótýge bolady. Sonymen birge, «A-Stýdıo», «Dýet - L», «ıAshlyq», «ABK», «Na-na» toptary jurtshylyqty ónerlerimen tamsandyrdy», - dep jazady basylym.
Sonymen birge, osy sanda «Egemen Qazaqstan» gazetindegi «Ǵaryshtan aıtylǵan quttyqtaý» atty maqalada Astanadaǵy gala-kontsert ótip jatqan ortalyq alańdaǵy teleekran arqyly ǵaryshker Talǵat Musabaev ǵarysh keńistiginen quttyqtaý joldaǵany týraly jazylady.
Al «Astana aqshamy» gazetiniń 9 maýsymdaǵy birinshi beti Astana kúniniń tuńǵysh merekesi «Bastaldy!» atty taqyryppen oqyrmanǵa jol tartady. Atalǵan maqalada Astananyń tusaýkeser rásimine bes kún qalǵanda Qajymuqan Muńaıtpasov atyndaǵy Ortalyq stadıonnyń ashylǵany, onyń lentasyn Nursultan Nazarbaevtyń qıǵany týraly baıandalady. Odan keıin El Prezıdentiniń qatysýymen Tóle, Qazybek jáne Áıteke bılerdiń eskertkishi ashylǵany jazylady.
Sondaı-aq «Astana aqshamynda» elordanyń tusaýkeseri qurmetine arnalǵan «Astana» estelik medaliniń sıpattamasy jazylǵan. «Medaldyń bet jaǵynda Astana qalasyndaǵy QR Prezıdentiniń rezıdentsııasy beınelengen. Onyń aıasynda sol jaqta QR Parlamentiniń úıi, oń jaǵynda bıik ǵımarat sulbasy bar. Medaldyń syrtqy betinde orta shende mıfologııalyq qanatty Barys beınelengen. Medal dıametri - 34 mm» dep jazady basylym.
Sonymen birge, gazettiń birinshi betinde Astana qalasynyń sol tustaǵy ákimi Ádilbek Jaqsybekov qalalyqtardy ortaq toıǵa at salysýǵa shaqyrady.
«Respýblıkamyzdyń jańa astanasynyń tusaýkeseri jazdyń jaımashýaq kúnderinde ótkeli otyr. Qazaqstan memleketiniń tarıhynda aıtýly oqıǵa bolyp tabylatyn úlken toıǵa ázirlený, qalamyzdy kórkeıtip, kóriktendirý sharalaryna qalalyqtar da, sheteldikter de belsene aralasty», - deı kele qala ákimi barlyq turǵyndardy merekege shaqyrady, - «Qıyn kezeńderde qısynyn taýyp barlyq múmkindikterdi Astanany kóterip, kórkeıtý isine tikeleı bas-kóz bolyp, bizdi qanattandyryp otyrǵan Elbasy, Prezıdentimiz Nursultan Ábishuly Nazarbaevqa qala halqynyń alǵysy ushan-teńiz. Sizderdi merekemen quttyqtaımyn. Toıymyz toıǵa ulassyn!»
Ózge basylymdarmen birge bas qalanyń «Info-Tses» gazeti 12 maýsymdaǵy sanynda «Ves mır tebıa znaet teper, Astana!» maqalasyn shyǵarǵan. Gazet sanynda Qazaqstannyń Ulttyq banki 9 maýsymda 20 teńgelik estelik tıyndardy shyǵarǵanyn habarlaıdy. Sondaı-aq, dál sol kúni «Orbıta» dúkeniniń aldynda jastardyń barlyǵy Parvız Nazarov pen «ABK» tobyn túnniń bir ýaǵyna deıin kútken. Alaıda kútken ánshileri sol túni kelmepti.
Info-Tses sondaı-aq, túrkitildi memleketterdiń V sammıtiniń ótkeni týraly baıan etedi.
«Atalǵan sammıt Qazaqstan astanasynyń tusaýkeserimen tuspa-tus keldi. Sammıtke memleket basshylary Nursultan Nazarbaev (Qazaqstan), Geıdar Alıev (Ázirbaıjan), Asqar Aqaev (Qyrǵyzstan), Sýleımen Demırel (Túrkııa), Islam Kárimov (Ózbekstan) jáne Túrikmenistan medjılısiniń tóraǵasy Sahat Mýradov kelip, aımaqtyq yntymaqtastyqty kúsheıtýde jańa joldardy ashty» delingen materıalda.
«Jas Alash» gazeti tusaýkeser qarsańynda, ıaǵnı 9 maýsymdaǵy sanynda birneshe qyzyqty faktilerdi keltiredi.
Basylymda Astananyń qurylysyna TMD elderiniń 4 myńǵa jýyq qurylysshy jumyldyrylǵany jazylǵan. Buǵan qosa Astananyń Bas jospary 1998 jyldyń 1 shildesine deıin Prezıdenttiń ústelinde jatýy kerektigi týraly baıandalady.
BAQ kóziniń habarlaýynsha, 30-ǵa jýyq sharaǵa álemniń túkpir-túkpirinen 100 myńǵa jýyq adam keledi, 300-ge jýyq BAQ ókilderi atsalysady. Astananyń tusaýkeserine 20 eldiń basshylary qatysady.
«Mádenı sharalardyń baǵdarlamasy aıasynda Astanada álemge áıgili Lýchano Pavarottı men London sımfonııalyq orkestri óner kórsetedi», - delingen maqalada.
