1970 jyldary shyǵarylǵan 500-ge jýyq eski órt tehnıkasy áli qoldanylyp júr

ASTANA. QazAqparat – Sońǵy 5 jylda tek 305 órt sóndirý kóligi satyp alynyp, 621 tehnıka esepten shyǵaryldy. Úkimet qaýlysymen bekitilgen «Azamattyq qorǵaý salasyndaǵy 2023-2027 jyldarǵa arnalǵan birinshi kezektegi sharalardyń keshendi josparynda» osyndaı derekter keltirilgen, dep habarlaıdy QazAqparat tilshisi.

«Tótenshe jaǵdaılar mınıstrligi bólimsheleriniń qaramaǵynda ártúrli fýnktsıonaldyq maqsattaǵy 3 875 avtotehnıka, 119 713 qural-jabdyq, 33 áýe kemesi bar. 1970-1990 jyldary shyǵarylǵan 500-ge jýyq órt tehnıkasy paıdalaný resýrsyn taýysqan jáne esepten shyǵarylýǵa tıis. Sońǵy 5 jylda tek 305 órt sóndirý avtomobıli satyp alyndy, bul rette 621 tehnıka esepten shyǵaryldy. Azamattyq qorǵanys áskerı bólimderiniń materıaldyq-tehnıkalyq jaraqtandyrylýy 80% quraıdy, onyń 65% jańartýdy talap etedi», - dep keshendi josparda búgingi tańdaǵy jaǵdaı baıandalǵan.

Buryn habarlaǵanymyzdaı, azamattyq qorǵaý organdarynyń qyzmetkerleri men TJM áskerı qyzmetshileriniń áleýmettik jaǵdaıyn jaqsartý jáne materıaldyq bazany jańartýǵa baǵyttalǵan 5 jyldyq keshendi jospar bekitildi.