1965 jyly tabylǵan koronavırýs COVID-19 emes

NUR-SULTAN. QazAqparat – Koronavırýstan qoryqpaı, jumysqa, kóshege shyǵyńyzdar dep aıtý – iritki salý. Bul týraly QR Aqparat jáne qoǵamdyq damý mınıstri Dáýren Abaev aıtty, dep habarlaıdy QazAqparat tilshisi.

«Qazir koronavırýs eshqandaı jańa aýrý emes, ol 1965 jyly anyqtalǵan jáne adamdardyń 70%-ynda oǵan qarsy ımmýnıtet bar degen aqparat taralýda. Bul jerde eskeretin másele bar. Dárigerler men mamandar meni tolyqtyrady dep oılaımyn. Koronavırýs – ol vırýs tuqymdasy. Oǵan 40-tan astam vırýs kiredi. Atıpııalyq pnevmonııa – bul da koronavırýs. Taıaý shyǵys respıratorlyq sındrom – ol da koronavırýstyń bir túri. Shynynda, 1965 jyly osyndaı vırýstyń alǵashqy túri tabylǵan. Biraq, ol COVID-19 emes. Sondyqtan, qazir koronavırýstan qoryqpaı, jumysqa, kóshege shyǵyńyzdar dep aıtý – iritki salý. Adamdarda COVID-19 vırýsyna qarsy eshqandaı ımmýnıtet joq. Sanıtarlyq talaptardy saqtap, úıde otyrý kerek», - Dáýren Abaev Habar24 arnasynda ótken onlaın brıfıngte.