1960 jyldary ǵalymdar Medeýde júrgizgen alǵashqy seısmıkalyq synaqtardyń nátıjesi jarııalandy
60-jyldary akademık Tóleýbaı Júnisovtyń jetekshiligimen alǵash ret Almatyda kirpishten salynǵan ǵımarattarǵa jasandy seısmıkalyq áserler jaǵdaıynda aýqymdy zertteýler júrgizildi. Onyń barysynda atalǵan ǵımaratta nyǵaıtýdy qajet etetini anyqtaldy.
Mundaı derekterdi anyqtaý úshin «Medeý» muz aıdyny bazasynda 1966-1967 jyldary Kishi Almaty ózeni shatqalynda (Medeý shatqalynda) selden qorǵaý bógetin salý úshin qajetti qýatty jarylystar serııasyn uıymdastyrý arqyly qalanyń qurylys nysandaryna dınamıkalyq synaqtar júrgizildi.
Osy synaqtardyń nátıjesi boıynsha 308 serııaly 3-4 qabatty kirpishten salynǵan ǵımarattar qoldanystaǵy qurylys normalarynyń talaptaryna saı kelmeıtini jáne olardyń seısmıkaǵa tózimdiligi 7 baldan aspaıtyny anyqtaldy. Mundaı ǵımarattar kúsheıtilýi kerek edi. Sonymen qatar kelesi normatıvtik qujattarda seısmıkalyq 8-9 baldyq aýdandarda kirpish qabyrǵalary bar ǵımarattardyń bıiktigi aıtarlyqtaı tómendegeni anyqtaldy. 9 baldyq aımaqtarda olardyń bıiktigi 2 qabattan, 8 baldyq aımaqtarda 3 qabattan, 7 baldyq aımaqtarda 4 qabattan aspaýǵa tıis bolatyn. 10 baldyq aımaqtarda qabyrǵalary kirpishten turatyn ǵımarattardy salýǵa tyıym salyndy.
Sol sebepti úılerdi nyǵaıtý boıynsha jumystar júrgizile bastap, «Medeý» kesheniniń konstrýktsııasyn ornyqty qasbeti qarastyrylǵan monolıtti etip saldy. Tutastaı alǵanda, sport keshenine birneshe ret jańǵyrtý júrgizilip, «QazQSǴZI» AQ mamandary «Medeý» tirek konstrýktsııalarynyń jaramdylyǵy men seısmıkaǵa tózimdiligin baǵalady. Ony jańǵyrtýǵa baılanysty usynystar jasaldy.
Aıta keteıik, «Medeý» kesheni – Almatydaǵy eń úlken jasandy muz alańy bar erekshe sáýlet nysandarynyń biri. Munda 200-den astam álemdik rekord ornatylǵan. Al qazir atalǵan nysan memlekettik eskertkishterdiń sanatyna jatady.
