1948-1950 jyldary dúnıege kelgen zeınetkerlerdiń problemalaryn sheshý úshin birlesken komıssııa qurý qajet - D.Nazarbaeva
ASTANA. 7 aqpan. QazAqparat - 1948-1950 jyldary dúnıege kelgen zeınetkerlerdiń problemalaryn sheshý úshin birlesken komıssııa qurý qajet.
Bul týraly búgin QR Eńbek jáne halyqty áleýmettik qorǵaý mınıstrliginiń alqa májilisinde QR Parlamenti Májilisiniń depýtaty Darıǵa Nazarbaeva aıtty.
1948-1950 jyldary dúnıege kelgen zeınetkerlerge qatysty ózekti másele bar ekendigin basa aıtqan D.Nazarbaeva: «Bul problemany tipti jalqaýlar da biledi. Ol jyldan jylǵa sóz bolady. Biraq atalǵan máselede eshqandaı sheshim joq. Bizder baqytsyzdyqqa oraı 1998 jylǵa deıin zeınetke shyqqan azamattardyń kóptegen úndeýlerine qalaı jaýap bererimizdi de bilmeımiz», - dedi.
Onyń atap ótýinshe, elimizde 1948-1950 jyldary dúnıege kelgen zeınetkerlerdiń sany 260 myń adamdy quraıdy. Olardyń basym bóliginiń jalpy eńbek ótili 35-40 jyl. 1990 jyldardaǵy ótpeli kezeń dál osy azamattardyń taǵdyrynda qaterli rólge ıe boldy. «Olarǵa ne isteý kerek? Mundaı ınflıatsııa men ómir súrý deńgeıiniń ósimi kezinde 28 myń teńgege qalaı ómir súrýleri qajet? Biz bul problemamen baısaldy aınalysýdy usynamyz. Naqty sheshimder ázirleý úshin birlesken komıssııa qurý qajet. Ómirde ymyraǵa kelýge árqashanda da oryn bar», - dedi halyq qalaýlysy.
