1945 j. 26 sáýiri: Keńes áskerleri Berlınniń birneshe aýdanyn basyp aldy

ALMATY. QazAqparat - 1945 jyldyń 26 sáýirinde, soǵystyń 1405 kúni Berlınde kúndiz-túni tolassyz kóshe urystary júrip jatty. Osy kúni Keńes áskerleri jaýdyń taban tiresken qarsylyqtaryn jeńe otyryp, qalanyń birneshe aýdanyn basyp aldy. Bul týraly «Sotsıalıstik Qazaqstan» gazetiniń 1945 jyldyń 28 sáýirindegi (senbi) №83-shi sanynda basylǵan Keńes aqparat bıýrosynyń málimetinde kórsetilgen.

Berlınniń ortalyq aýdandaryn - «Z» sektoryn nemese «Tsıtadeldi» vermahttyń (nemis qarýly kúshteri) soǵysqa anaǵurlym qabiletti bólimsheleri, eses otrıadtary jáne basqa da tańdaýly bólimsheler qorǵady. Munda urystar keskilesken sıpat aldy.

«26 sáýirde 2-shi Belorýs maıdanynyń 65-shi armııasy aýyr urystar júrgize otyryp, Germanııanyń soltústiginde ornalasqan iri teńiz porty - Shtettın qalasyn basyp aldy. Sóıtip 30 shaqyrym alǵa jyljydy»6 - delingen málimette.

Sonymen qatar, 1-shi Belorýs maıdanynyń áskerleri Berlın qalasynda qııan-keski kóshe urystaryn júrgize otyryp, GARTENShTADT jáne SIMENSShTADT aýdandaryn jáne Gerlıts temirjol vokzalyn basyp aldy. Sonymen qatar, Berlınniń soltústik-shyǵysynda maıdan áskerleri FINOV, FINOVFÝRT, MARIENVERDER eldi-mekenderin aldy.

«ODER-degi FRANKFÝRT qalasynyń batys jáne ońtústik batysynda maıdan áskerleri KENIGS-VÝSTERHAÝZEN, NOIE-MıÝLE, ShTORKOV, BEESKOV, LIBEROZE qalalaryn jáne ZENTsIG, GÝSSOV, GROSS-ShAÝEN, DAMSDORF, HERTsBERG, GERS-DORF, ShTREMMEN, TREBACh, MITVEIDE, GROSS-LEITEN, MOHOV eldi-mekenderin aldy», - delingen málimette.

25 sáýirdegi urystarda maıdan áskerleri 2000-nan astam nemis soldaty men ofıtserin qolǵa túsirip, 70 - ushaqty, 30 - tank pen ózdiginen júretin zeńbirekti, 248 - dala zeńbiregin, 1467 - avtokólikti, 53 - parovozdy, 3404 - temir jol vagonyn oljalady.

Al 1-shi Ýkraın maıdanynyń áskerleri Berlınniń ońtústik batysynda keskilesken kóshe urystaryn júrgize otyryp, DALEM aýdanyn basyp aldy. Al Elba ózeniniń batys jaǵalaýynda maıdan áskerleri TORGAÝ jáne STRELA qalalaryn aldy.

«25 sáýir kúngi urystarda maıdan áskerleri 1500 nemis soldaty men ofıtserin qolǵa túsirip, 238 - tank pen ózdiginen júretin zeńbirekti jáne 236 dala zeńbiregin oljalady» - delingen málimette.

Sonymen qatar, osy kúni 2-shi Ýkraın maıdanynyń áskerleri Chehoslovakııanyń iri ónerkásip ortalyǵy BRNO qalasyn aldy.