1942 jyly latyn álipbıimen jazylǵan hat kórmege qoıyldy

ATYRAÝ. QazAqparat - Atyraý tarıhı-ólketaný mýzeıinde latyn grafıkasymen jazylǵan qujattar ekspozıtsııasy ashyldy, dep habarlaıdy «QazAqparat» HAA tilshisi.

«Burynnan saqtalyp kele jatqan qujattardyń biraz bóligi tarıhı mánge ıe, sondyqtan olardy oqý tarıhtyń ázirge belgisiz betterin ashýǵa septigin tıgizedi. Papkalardyń birinen biregeı qujatty taptyq. Ol - maıdanda júrgen Shoqan Qarjaýovtyń jubaıyna jazǵan haty. Hat 1942 jyly jazylǵan. Bul qazaqtardyń kırıllıtsaǵa ótken 1940 jyldan keıin de ózderine úırenshikti latyn jazýyn qoldana bergenin dáleldeıdi», - deıdi mýzeı dırektory Rashıda Harıpova.

Kórmeden: latyn grafıkasymen jazylǵan partııalyq konferentsııa delegatynyń mandaty men komsomol bıletin, dıplom, qurmet gramotasy, kitap sııaqty eksponattardy tamashalaýǵa bolady.

Mýzeı qyzmetkerleriniń pikirinshe, qyrqynshy-elýinshi jyldary jasyrylǵan latyn grafıkasymen jazylǵan qujattar arhıvterdiń túkpir-túkpirlerinde áli de kóptep tabylýy múmkin. Qorlardan latyn grafıkasyndaǵy qujattardy izdeý arqyly ǵalymdar tarıhtyń belgisiz betterin ashýǵa úmittenip otyr. Onyń ústine, birneshe jyldan soń osy qujattardyń barlyǵy elge uǵynyqty bolady.