1941-1945 jyldardaǵy Uly Otan soǵysyndaǵy Jeńis kúniniń 65 jyldyǵy qurmetine arnalǵan merekelik medal taǵaıyndaldy - respýblıkalyq basylymdarǵa sholý

***

«Egemen Qazaqstan» gazetiniń senbilik nómirinde Memleket basshysynyń Jeńis kúniniń 65 jyldyǵy qurmetine arnalǵan merekelik medal týraly Jarlyǵy, sondaı-aq onymen nagradtaý erejesi men merekelik medaldyń sıpattamasy jarııalandy.

«QR Premer-Mınıstri Kárim Másimov keshe Qazaqstan Konstıtýtsııasynyń 15 jyldyǵyn merekeleý jónindegi Memlekettik komıssııanyń otyrysyn ótkizdi», dep jazady «Egemen Qazaqstan» gazeti. Otyrys beıneselektorlyq keńes túrinde QR Konstıtýtsııalyq Keńesi, Prezıdent Ákimshiligi, ortalyq jáne jergilikti atqarýshy organdar basshylyǵy ókilderiniń qatysýmen ótken. Komıssııa otyrysynyń barysynda QR Konstıtýtsııasynyń 15 jyldyǵyna arnalǵan sharalardy uıymdastyrý jáne ótkizý máseleleri talqylanǵan. Atap aıtqanda, 2010 jylǵy tamyzdyń 30-ynda Astana qalasynda áskerı sherý ótkizý jáne eldiń barlyq aımaǵynda merekelik mádenı-buqaralyq, aǵartýshylyq jáne sporttyq sharalar uıymdastyrý jospary qaralǵan.

Basylymnyń «Prezıdent poshtasynan» aıdarynda Elbasynyń atyna túsip jatqan jedelhattar berilgen. Máselen, Qyzylorda oblysynyń Qazaly aýdanyndaǵy № 249 mektep-lıtseıdiń dırektory Kúlásh Mergenbaeva óz hatynda Prezıdenttiń bıylǵy Qazaqstan halqyna Joldaýynda otandyq bilim berý júıesine, sonyń ishinde ıntellektýaldyq mektepterdiń basymdyqqa ıe bolatyny týraly bastamasyna rızashylyǵyn bildirip, «Ózińizdiń bastamańyzben «100 mektep, 100 aýrýhana» baǵdarlamasy boıynsha aýdanymyzda 1200 oryndyq mektep salyndy», degen.

Osy taqyrypty odan ary qozǵaǵan «Kazahstanskaıa pravda» gazetinde Astana qalasynyń turǵyny Іshki ister mınıstrliginiń zeınetkeri Mahmut Meıirmanovtyń jedelhaty basyldy. Ol óz hatynda Elbasynyń sara saıasaty nátıjesinde Qazaqstannyń bıyl Eýropadaǵy qaýipsizdik jáne yntymaqtastyq uıymyna tóraǵa bolǵanyn maqtanysh tutatynyn jazǵan. Sondaı-aq M.Meıirmanov Elbasy tarapynan el ıgiligi úshin atqarylǵan jáne atqarylyp jatqan ulan-ǵaıyr isterge toqtalyp, Memleket basshysy zor densaýlyq tilegen.

***

«Keshe Astanada QR Densaýlyq saqtaý mınıstri Jaqsylyq Dosqalıevtiń qatysýymen onkologııalyq jáne basqa da syrqattardy aldyn ala anyqtaýǵa múmkindik beretin Pozıtrondy-emmısıondyq tomograf ortalyǵy ashyldy», dep jazady «Astana aqshamy» gazeti. Basylymnyń habarlaýynsha, PET - sáýleler arqyly ishki aǵzalardyń sýretin ǵana emes, sonymen qatar olardyń fýnktsıonaldyq jumysyn kórýge múmkindik beredi. Onyń basty ereksheligi, onkologııalyq jáne basqa da aýrýlardy, olardyń klınıkalyq belgileri kórinbeı turǵan kezde anyqtaı alady. Bul apparat Ortalyq Azııa boıynsha alǵash bizdiń elimizde ǵana ornatylyp otyr.

«Astana aqshamy» gazetiniń aıqara betinde kúıshi-kompozıtor Seken Turysbekovpen aradaǵy suhbat «Qazaqtyń kúı óneri toqyraýǵa ushyrap otyr» degen taqyryppen basylǵan. Basylym saýaldaryna jan-jaqty jaýap bergen kúıshi «jalpy kúı ónerinde zaman ózgergen saıyn taqyryp qana emes, kúı yrǵaǵy da ózgerip otyrdy. Biraq kúıdiń bári ásershildikten týady. Biz, bálkim, sol qasıetten aıyrylyp bara jatqan shyǵarmyz. Bulaı deıtinim, qazir ulttyq ónerdi ańsap, shólirkeıtinder azaıyp barady. Jastar túgil, úlkenderimizdiń ózderi bereri shamaly, ársiz, nársiz jeńilge oıysýda», degen pikirin bildire ketken.

***

«Aınaldyrǵan bir aıdyń ishinde oryn alǵan sý apattary elimizdiń tótenshe jaǵdaılarǵa daıyn emes ekenin aıqyndap berdi. Bul salada biz beıshara keıipte tur ekenbiz. Tek sý tasqynyna emes, oryn alýy yqtımal apattardyń kez kelgenine daıyndyǵymyz joq ekenin ańǵardyq», dep jazady «Alash aınasy» gazeti «Toqeteri: tótenshe jaǵdaılarǵa daıyn bolmaı shyqtyq» atty maqalasynda. Basylym redaktsııasy elimizdiń Tótenshe jaǵdaılar mınıstrligine qarasty bólimshelerdegi tehnıkalyq ahýaldy zerttemek maqsatpen birneshe oblystaǵy tıisti mekemege habarlasyp, Shyǵys Qazaqstan oblysynan basqasynan «Bul - qupııa málimet» degen jaýap alypty. «Qudaı-aý, qupııa bolatyndaı traktor men qaıyq, tikushaqtar - áskerı laıner ıa bolmasa boıng pen tankter emes qoı? «Aýrýdy jasyrǵanmen, ólim áshkereleıdi». Bálkim, tehnıkalyq quraldardyń azdyǵy men kóneligin aıtýdan jasqanǵan bolar», deıdi basylym.

«Alash aınasy» basylymynyń búgingi nómiri elimizdiń túpkir-túpkirinde oryn alyp jatqan sý tasqynyna arnalǵan. Máselen, «Shaban ákimder jazaǵa tartylady» degen taqyryppen basylǵan maqalada Tótenshe jaǵdaılar mınıstri V.Bojkonyń shyǵys óńirdegi tasqyn bolǵan jáne bolatyn aýyldarmen tanysqandyǵy keńinen jazylǵan. Basylymnyń jazýynsha, mınıstrmen birgen bolǵan oblys ákimi B.Saparbaev qorytyndy kezdesýde tasqyn bolǵan aımaqtardaǵy ákimderdiń jumysyna óte nashar baǵa berip, salǵyrt qaraǵan aýdan, aýyl ákimderiniń qandaı da bir jaýapqa tartylatyndyǵyn jetkizgen.

Osy basylymnyń dástúrli «Oı-kókpar» aıdarynyń búgingi saýaly: «Bilip turyp sý tasqynyna tosqaýyl qoıa almaý jergilikti bıliktiń biliksizdigi me?» Bul suraqqa jaýap bergen senator Ǵarıfolla Esim «osy ýaqytqa deıin oryn alǵan sý tasqynyna baılanysty oqıǵalardy saraptar bolsaq, shynymen de, jergilikti bıliktiń biliksizdik tanytqanyna kýá bolyp otyrmyz. Shynyn aıtý kerek, jergilikti atqarýshy bılik eshqandaı da jumys jasap otyrǵan joq. Iıa, sý tasqyny - tabıǵı apat, degenmen «tabıǵı apat» eken dep, qol qýsyryp qarap otyrýǵa bola ma?», dese qoǵam qaıratkeri Amangeldi Aıtaly «barlyǵyna jergilikti bılikti kináli deýge bolmaıdy. Olar qoldarynda bar múmkinshiligin ǵana paıdalanyp otyr. Kerek deseńiz, aýyldyń bıýdjetinde ońǵan aqsha da joq. Sý tasqyny túgil, jaýǵan qardy arshıtyn da jetkilikti tehnıkalyq qural-jabdyqtar joq. Osyndaı jaǵdaıda «jalań qolmen ot kóse» dep qalaısha nusqaý berýge bolady?!» depti.

***

«Shynaıy ǵylym izdep júrgenderdi qazirgi kezdiń Don Kıhottary deýge bolady». Osy taqyryppen «Aıqyn» gazetiniń «Aq sóıle!» aıdarynda jaryq kórgen suhbat M.Áýezov atyndaǵy Ádebıet jáne óner ınstıtýtynyń bólim meńgerýshisi, fılologııa ǵylymynyń doktory, professor Aıgúl Іsimaqovamen arada órbigen. Ekeýara áńgimeniń tolyq nusqasyn basylymnyń senbilik sanynan oqı alasyzdar.

«Qazatomónerkásip» AQ-tyń burynǵy basshysy Muhtar Jákishevtiń isi boıynsha jaqynda úkim shyǵarǵan Astana qalasy, Saryarqa aýdanynyń № 2 aýdandyq sotynyń sýdıasy Nurjan Joldasbekov pen memlekettik aıyptaýshy Ákim Adaı keshe BAQ ókilderin shaqyryp, baspasóz máslıhatyn ótkizdi. Osyǵan oraı «Aıqyn» gazetinde «Sottan keıingi suraqtar nemese «Jákishev isiniń» mán-jaıy» degen taqyryppen maqala jaryq kórdi. Basylymnyń jazýynsha, aldyn ala tergeý barysynda tárkilengen Jákishevtiń para retinde alǵan aqshalary, sondaı-aq «Qazatomónerkásip» AQ vıtse-prezıdentterine, departament dırektorlaryna, qurylymdyq bólimsheler men enshiles kásiporyndar basshylaryn zańsyz jolmen tólengen, keıin óz erikterimen qaıtarǵan aqshalardyń barlyǵy, atap aıtqanda 19 mln. 159 myń 900 teńge, 2 mln. 739 myń 948 AQSh dollary, 144 myń 700 eýro, 1 mln. reseı rýbli jáne 450 aǵylshyn fýnt sterlıngi memleket kirisine qaıtarylǵan.