1937 jylǵy qamqorlyǵy úshin Ońtústik Koreıa káristeri qazaqtarǵa alǵys aıtty

ALMATY. QazAqparat - Almatyda kóp ultty qoǵamda beıbit ómir súrý taqyrybyn talqylaýǵa arnalǵan 18-shi Búkilálemdik Koreı forýmy ótti. Forýmdy Qazaqstannyń Koreı qaýymdastyǵy jáne Almaty qalasyndaǵy Koreıa Respýblıkasynyń Bas Konsýldyǵynyń qoldaýymen ál-Farabı atyndaǵy Qazaq ulttyq ýnıversıteti men Jahandyq koreı qory uıymdastyrdy, dep habarlaıdy QazAqparat tilshisi.

Atalǵan jahandyq koreı qory Eýropa, Azııa, Soltústik Amerıka men Avstralııa elderindegi jetekshi joǵary oqý oryndarynda 17 forým uıymdastyrǵan.
Sharanyń plenarlyq jáne sektsııalyq otyrystarynda birqatar taqyryptarmen birge «1937 jylǵy kúshtep jer aýdarý týraly tarıhı estelik» taqyryby keń talqylandy.



Qazaqstan men Koreıa qarym-qatynasyn sóz etken Shyǵys Azııadaǵy beıbitshilik máseleleri boıynsha Halyqaralyq konferentsııa komıtetiniń tóraǵasy Lı Bý ıAng qazaqtarǵa zor alǵys bildirdi.
«Qazaq halqy osydan 80 jyl buryn, 1937 jyly kúshtep jer aýdarylǵan koreılerge atamekeninen qonys berip, qoltyǵynan demep, qol ushyn berdi. Ál-Farabı atyndaǵy QazUÝ bastamasymen uıymdastyrylyp jatqan forým da qazaqtardyń qonaqjaılyǵynyń bir belgisi», - dedi ol.
Forýmdy ashqan QazUÝ rektory Ǵalym Mutanov Qazaqstandaǵy ulttardyń myzǵymas dostyǵy men birligi elimizdiń orasan zor jetistigi ekenin basa aıtty.
«Qazaq jerine jer aýdarylǵanyna bıyl 80 jyl tolǵan koreı dıasporasynyń Qazaqstan halqynyń tatý januıasynda ózindik orny bar. Qazaqstandyq koreıler Koreı túbegi men Eýrazııa kontınenti arasyndaǵy turaqty kópir rólin atqarady», - dedi ol.
Aıta keteıik, 23 shilde kúni Reseıdiń Vladıvostok qalasynan káristerdiń jer aýdarylǵanyna 80 jyl tolǵan oqıǵany atap ótýge arnalǵan «Estelik poıyzy» shyqty. Ol poıyz osydan 80 jyl buryn kúshtep jer aýdarylǵan on myńnan astam koreı kelip qonystanǵan Úshtóbe qalasyna 1 tamyz kúni jetken bolatyn. Almatyda ótken forýmǵa «Estelik poıyzynyń» 80-ge jýyq qatysýshysy keldi. Delegatsııa ókilderi Úshtóbege jaqyn Bóstóbe jotasynda ornalasqan memorıaldy keshende jer aýdarylǵan koreılerdi eske alý keshin ótkizip, qoldaý kórsetken qazaq halqyna rızashylyqtaryn aıtty.