19 mln teńge aıyppul: áleýmettik nysandardaǵy zańbuzýshylyqtar anyqtaldy
ASTANA. KAZINFORM — Jyldyń basynan beri áleýmettik ınspektorlar tarapynan barlyǵy 190 tekserý júrgizildi. Onyń ishinde 86-sy jospardan tys, 99-y profılaktıkalyq baqylaý sheńberinde, al 5 tekserý prokýratýranyń talap etýimen ótkizilgen. Bul týraly Eńbek jáne halyqty áleýmettik qorǵaý mınıstrligi málim etti.
Tekserý qorytyndysy boıynsha anyqtalǵan zańbuzýshylyqtardy joıý jóninde 149 nusqama berilip, jalpy somasy 19,3 mln teńgeden asatyn 64 aıyppul salyndy.
— Memlekettik baqylaýmen túrli saladaǵy nysandar qamtyldy: 81 memlekettik jáne kvazımemlekettik uıym, 12 densaýlyq saqtaý mekemesi, 22 bilim berý, 23 áleýmettik qorǵaý nysany, 12 mádenıet, 8 sport nysany, 7 kólik ınfraqurylymy obektisi, 5 qoǵamdyq tamaqtaný orny, 11 saýda nysany jáne 9 ózge de uıymdar, — delingen habarlamada.
Astana qalasy boıynsha QR Eńbek jáne halyqty áleýmettik qorǵaý mınıstrliginiń Áleýmettik qorǵaý salasyndaǵy retteý jáne baqylaý komıteti departamenti prokýratýranyń bastamasymen bilim berý basqarmasyna qarasty 4 jeke mektepte jospardan tys tekserý júrgizildi. Tekserýler nysandardyń halyqtyń az qozǵalatyn toptary úshin qoljetimdiligi turǵysynan ótti. Nátıjesinde anyqtalǵan buzýshylyqtardy joıý týraly usynystar berilip, jaýapty tulǵalar ákimshilik jaýapkershilikke tartyldy.
Astana qalasynyń turǵyny, ІІІ toptaǵy múgedektigi bar Dınara Spataevanyń aıtýynsha, sońǵy jyldary múgedektigi bar azamattar úshin qoljetimdilik aıtarlyqtaı jaqsaryp keledi.
— Jyl saıyn múgedektigi bar jandar úshin qoljetimdi orta qalyptasyp kele jatqany baıqalady. Nysan ıeleri men kásipkerlerdiń jaýapkershiligi artyp, erekshe qajettilikteri bar adamdarǵa degen kózqaras ózgerýde. Qazirgi jańa ǵımarattardyń kópshiliginde pandýstar, baspaldaqtaǵy tutqalar, taktıldi jolaqtar men lıftiler bastapqydan qarastyrylǵan. Al jumys istep turǵan nysandar da barlyq sanattaǵy múgedektigi bar azamattarǵa yńǵaıly bolýǵa beıimdelip keledi, — deıdi ol.
