19 jerinen pyshaq salǵan: Túrkistanda kúdikti izdestirilip jatyr
TÚRKІSTAN. KAZINFORM — Burynǵy áıelindegi balalaryn kórýge kelgen turǵyn janjal shyǵarǵan. Aradaǵy kıkiljińnen keıin áıeldiń aǵasy ony pyshaqtap, ózi qashyp ketken.
Áleýmettik jelide taraǵan aqparatqa súıensek, turǵyn 19 jerinen pyshaqtalyp, aýrýhanaǵa túsken. Al, kúdiktige izdeý jarııalandy.
Túrkistan oblysy polıtsııa departamentiniń baspasóz qyzmeti kúdiktiniń jeke basy anyqtalyp, ony ustaý sharalary qabyldanǵanyn jetkizdi.
«Polıtsııa turmystyq janjal negizinde bolǵan „kisi óltirýge oqtalý“ faktisi boıynsha qylmystyq is qozǵady. Burynǵy jubaıyndaǵy balalardy kórýge kelgen jábirlenýshi — buryn birneshe ret sotty bolǵan Shymkent qalasynyń turǵyny. Osy kezde ol men áıeliniń aǵasy arasynda janjal bolyp, er adam pyshaq jaraqatyn alǵan. Qazirgi ýaqytta qajetti jedel-izdestirý jáne tergeý áreketteri júrgizilýde. Oqıǵanyń barlyq mán-jaıy anyqtalýda. Tergeý múddesindegi ózge de aqparat jarııalanbaıdy» delingen vedomstva aqparatynda.
