19 jastaǵy jigit jalǵyzbasty áıeldiń úıine pyshaqpen kirip, tonap ketken
ALMATY. QazAqparat - Almatyda jalǵyzbasty áıeldiń úıine pyshaqpen kirip, tonap ketken qaraqshy ustaldy, dep habarlaıdy QazAqparat tilshisi.
Almaty qalalyq Polıtsııa departamentiniń málimetinshe, 19 jastaǵy er adam túnde jalǵyzbasty áıeldiń páterine kirip, ony pyshaqpen qorqytqan. Solaı, jınaǵan aqshasy men baǵaly zattaryn berýdi talap etken.
«Qatty qoryqqan jábirlenýshi onyń aıtqandaryn buljytpaı oryndaǵan. Kúdikti onyń telefonyn da ıemdenip, keıin mobıldik qosymsha arqyly bank shotyndaǵy aqshasyn sheship alǵan», - dedi Áýezov aýdandyq polıtsııa basqarmasynyń bastyǵy Ulan Ábilqaıyr.
Onyń aıtýynsha, áıelden polıtsııaǵa aryz túse salysymen dereý jedel top qurylǵan. Nátıjesinde qaraqshylyq shabýyl jasaǵan adam anyqtalyp, qamaýǵa alyndy.
«Qazir kúdikti ýaqytsha ustaý ızolıatoryna qamaldy. Ol – Almaty oblysy, Panfılov aýdanynyń turǵyny», – dep atap ótti polıtsııa ókili.
