19 jastaǵy petropavldyq 500 lıtr araqty zańsyz satpaq bolǵan

PETROPAVL. QazAqparat – Petropavlda polıtseıler 19 jastaǵy turǵynnan aktsızdik markasy joq 500 lıtr alkogol ónimin tárkiledi, dep habarlaıdy QazAqparat tilshisi.

Soltústik Qazaqstan oblysy Polıtsııa departamenti baspasóz qyzmetiniń málimetinshe, uıymdasqan qylmysqa qarsy kúres basqarmasyna «Jas órken» shaǵynaýdanyndaǵy garajdardyń birinde aktsızsiz alkogol ónimi saqtalýy múmkin degen jedel aqparat túsken. Shuǵyl sharalardy júrgizý barysynda polıtseıler oblystyń 19 jastaǵy turǵynyn ustady. Jigittiń garajynda aktsızdik markasy joq 0,5 lıtrlik myńdaǵan bótelke tabyldy. Olardyń ishinde araq bolǵan. Tárkilengen ónimniń jalpy kólemi 500 lıtr.

Bul fakt Petropavl qalasy polıtsııa basqarmasynyń aqparatty esepke alý kitabyna tirkeldi. Ýchaskelik polıtsııa ınspektorlary QR Ákimshilik quqyq buzýshylyq týraly kodekstiń 463-babynyń 1-bóligi boıynsha («kásipkerlik nemese ózge de qyzmetpen aınalysý, sondaı-aq tıisti tirkeýsiz, ruqsatsyz nemese habarlama jibermeı is-áreketterdi (operatsııalardy) júzege asyrý») boıynsha ákimshilik materıal jınady. Qazirgi ýaqytta alynǵan suıyqtyq saraptamaǵa jiberildi. Garaj ıesiniń aıtýynsha, ol alkogoldi odan ári satý úshin saqtaǵan.

«Jyl basynan beri bólimshe qyzmetkerleri zańsyz aınalymnan 5144 lıtr zańsyz alkogol ónimin aldy. Bul baǵytta jumys jalǵasyn tabady», - dedi SQO PD uıymdasqan qylmysqa qarsy kúres basqarmasy bastyǵynyń mindetin atqarýshy Rahat Nurahmetov.