19 jastaǵy qaraǵandylyq jigit 250 myń teńgege tanysyn óltirýge tapsyrys bergen
QARAǴANDY. QazAqparat - Qaraǵandyda polıtseıler tapsyryspen adam óltirý qylmysynyń aldyn aldy, dep habarlady oblystyq ІІD baspasóz-qyzmetinen.
Vedomstvo baspasóz qyzmetiniń aqparatynsha, 19 sáýirde adam óltirýge tapsyrys bergen jigit Qaraǵandy saýda úıleriniń biriniń mańynda ustaldy.
«9 naýryzda Qaraǵandy oblysynyń ІІD-ne 19 jastaǵy jigit 18 jastaǵy tanysyn óltirý úshin kıller izdep júrgeni jaıly habar tústi. Jedel-izdestirý sharalary kezinde tapsyrys berýshi 250 myń teńge kóleminde syıaqy taǵaıyndaǵany jaıly áńgime tirkeldi. Jigit aqshany berip, oryndaýshy dálel retinde máıittiń sýretin kórsetedi degen talap qoıdy», - dedi ІІD baspasóz qyzmetinen.
Ustalǵan azamat ýaqytsha ustaý oqshaýlaǵyshyna qamaldy. Oǵan qatysty QR QK 99-baby 2-bólimi boıynsha sotqa deıingi tergeý amaldary júrgizilip jatyr.
