19 jastaǵy bozbala Qostanaı sport kesheninde atys uıymdastyrdy
QOSTANAI. QazAqparat - Keshe keshke Qostanaıdyń «Trýdovye rezervy» sport kesheninde atys boldy, dep habarlaıdy «QazAqparat» HAA tilshisi. Kelýshilerdiń biri «Osa» travmatıkalyq tapanshasynan óz qarsylasynyń basyna oq atqan.
Qostanaı oblysy ІІD bul aqparatty rastap, myna mazmunda habarlama taratty: «19 jastaǵy Qostanaı qalasy turǵynynyń buzaqylyq áreketi faktisi boıynsha polıtsııa sotqa deıingi tergeý jumystaryn júrgizýde. Kúdikti ustaldy. Qylmys qarýy - «Osa» travmatıkalyq tapanshasy tárkilendi. Saraptamalar bastaldy. Oqıǵanyń mán-jaıyn anyqtaýǵa qajetti barlyq tergeý sharalary júrgizilýde».
Jergilikti áleýmettik jelide atys kýágerleri óz pikirlerimen bólisýde. Qoldanýshylardyń biri: «...eki sportshy shekisip qaldy, barlyq bapkerler shaqyryldy. Onda kishkentaı baladan qarttarǵa deıin bir top qaýym boldy. Polıtsııa jarty saǵat boıy ǵımaratqa eshkimdi kirgizbedi».
Basynan jaraqat alǵan sportshy Mıhaıl Shvets aýrýhanaǵa tústi. Dárigerlerdiń aıtýynsha, onyń ómirine tóngen esh qaýip joq.
