19 jastaǵy Sandýǵash Kenjebaeva Antalııa týrnıriniń shırek fınalyna ótti

ORAL. KAZINFORM – Qazaqstandyq, 19 jastaǵy Sandýǵash Kenjebaeva jekeleı synda Antalııa (Túrkııa) ITF týrnıriniń shırek fınalyna ótti.

Dúnıejúzilik reıtıngide 1171-orynda turǵan qazaqstandyq jas tennısshi aldymen tartysty matchta reseılik Mılana Safıýllınany joldan taıdyrdy – 7:6 (8:6), 6:4.

Sandýǵash ekinshi aınalymda, otandasy, álemniń 754-raketkasy Arýjan Saǵyndyqovany qapy qaldyrdy – 7:5, 6:3.

Sandýǵash Kenjebaeva jartylaı fınalǵa shyǵý úshin álemniń – 660, osy jarystyń 2-raketkasy, germanııalyq Natalııa Sıdlıskamen talasady.

A.Saǵyndyqova alǵashqy aınalymda ıtalııalyq, reıtıngide 837-satydaǵy Samıra De Stefanony utqan edi – 7:5, 6:2.

Taǵy bir qazaqstandyq Dana Baıdáýlet birinshi kezdesýinde reıtıngide 1343-oryndaǵy meksıkalyq Klaýdıa Sofııa Martınes Solısti 7:5, 1:6, 6:2 esebimen jeńdi. Alaıda ekinshi aınalymda álemniń 691-raketkasy, ıtalııalyq Verena Melıske jol berdi – 0:6, 3:6.

Zarına Dııas Fýkýoka (Japonııa) ITF W 75 týrnıriniń ekinshi aınalymynda álemniń 286-raketkasy, ońtústikkoreıalyq Sý Djon Chanǵa 4:6, 4:6 esebimen ese jiberip, shırek fınaldan tys qaldy.

Eske sala keteıik, budan buryn Zarına Dııastyń eki jyldan keıin alǵashqy jeńisine qol jetkizgenin jazǵan bolatynbyz.

Sondaı-aq Aleksandr Shevchenko Rım masters týrnıriniń ekinshi aınalymyna shyqty.