19 jastaǵy qyzylordalyq TikTok arqyly veıp satqany úshin kóshe tazalap júr
QYZYLORDA. KAZINFORM — Áleýmettik jeli arqyly zańmen tyıym salynǵanyna qaramastan elektrondy temeki satyp, alaıaqtyq jasaǵan 19 jastaǵy qyzylordalyqqa qatysty sot úkimi shyqty.
Oblystyq qylmystyq atqarý júıesi departamenti habarlaǵandaı, ol qylmystyq kodekstiń 190-baby 2-bóliginiń 4-tarmaǵy boıynsha kináli dep tanylyp, sot sheshimimen 200 saǵat qoǵamdyq jumysqa tartyldy. Qyzylorda qalalyq probatsııa qyzmetiniń esebine alyndy.
— Azamat TikTok áleýmettik jelisinde tyıym salynǵan veıpti jarnamalap, adamdardy aldap, aqsha alý arqyly alaıaqtyqpen aınalysqan. Jas jigit elektrondy temeki men veıp satýdyń zańǵa qaıshy ekenin bilmegenin, jarnamalap satsa, ońaı tabysqa keneletinin oılaǵanyn, isine ókinetinin aıtyp aqtalǵan. Qazirgi ýaqytta kúnine tórt saǵat qala kóshelerin abattandyrý jáne tazalaý jumysyna tartyldy, — delingen habarlamada.
Qyzylorda oblysynda jyl basynan beri qoǵamdyq jumysqa tartylǵan 22 adamnyń 14-i belgilengen saǵattaryn tolyq oryndap, probatsııa esebinen shyǵaryldy. Qalǵany qoǵamdyq jumys boıynsha jazasyn ótep júr.
Buǵan deıin biz Qarakesek laqap atymen tanymal ánshi Omar Amantaevtyń esirtki zatyn taýyp alyp, saqtaǵany úshin 100 saǵat qoǵamdyq jumysqa tartylǵanyn habarladyq.
