19 jasynda kóz jumǵan fýtbolshy «Qaırat» akademııasynyń túlegi bolǵan

ASTANA. KAZINFORM — Almatyda Qazaqstan birinshi lıgasynyń fýtbol chempıonaty aıasynda jergilikti «Han-Táńiri» jáne Ekibastuz komandasy arasyndaǵy match kezinde qaıǵyly oqıǵa boldy. 

«Han-Táńiri» klýbynyń shabýylshysy Dıas Tóleý ómirden ótti. «Qaı̆rat» FK Akademııasy Dıastyń akademııa túlegi bolǵanyn habarlady. Sondaı-aq «Qaırat» fýtbol klýby sportshynyń týǵan-týystary men jaqyndaryna kóńil aıtty.

— Dıas 2016–2023 jyldary bizdiń Akademııada tárbıelenip, alǵashqy QJ League maýsymynda «Qaırat» U-18 komandasynyń sapynda chempıon atanǵan. Ol meıirimdiligimen, eńbekqorlyǵymen erekshelenip, bapkerleri men komandalastarynyń qurmetine ıe boldy. «Qaırat» fýtbol klýby Dıastyń týǵan-týystary men jaqyndaryna shyn júrekten kóńil aıtady. Qaıǵylaryńyzǵa ortaqpyz, — delingen klýb taratqan aqparatta.

Aıta keteıik, oıynnyń 62-mınýtynda «Han-Táńiri» oıynshysy Dıas Tóleý alańǵa qulady. Kóp uzamaı fýtbolshyny zembilmen alyp ketti. Translıatsııada onyń esin bilip jatqanyn kórýge bolady. Atalǵan oqıǵadan keıin úsh saǵat ótken soń Qazaqstan fýtbol federatsııasy Dıas Tóleýdiń qaıtys bolǵanyn habarlady.