19 tamyz. Kazinform kúntizbesi. Tulǵalar
Búgin, 19 tamyz kúni tulǵalardan kimder dúnıege kelgen? Kazinform oqyrmandaryna esimder kúntizbesin usynady.
ESІMDER
51 jyl buryn (1975) Respýblıkalyq Advokattar alqasynyń tóraǵasy Madı Jomartuly MYRZAǴARAEV dúnıege keldi.
Jambyl oblysynyń Jaıylma aýylynda týǵan. Taldyqorǵan zań tehnıkýmyn (1994) jáne Shyǵys Qazaqstan memlekettik ýnıversıtetin (1998) zańtaný mamandyǵy boıynsha bitirgen.
Eńbek joly: 1994-2003 jyldary Qazaqstan Respýblıkasynyń prokýratýra organdarynda jumys istedi. 2003 jyly advokat, Batys Qazaqstan oblystyq advokattar alqasynyń múshesi, 2018-2022 jyldary Respýblıkalyq advokattar alqasy tóralqasynyń múshesi, 2025 jyldyń qarashasynan bastap Batys Qazaqstan oblystyq advokattar alqasy tóralqasynyń múshesi; Respýblıkalyq advokattar alqasynyń tóraǵasy, 2026 jyldyń qańtarynan bastap — Konstıtýtsııalyq reforma jónindegi komıssııanyń múshesi boldy.
Qazirgi qyzmetin 2025 jyldyń qarashasynan bastap atqaryp keledi.
«Kásibıligi úshin», «Zańgerlik mamandyqty damytýǵa qosqan úlesi úshin», «Eren eńbegi úshin» (2026) medaldarymen marapattalǵan.
47 jyl buryn (1979) Qazaqstan Respýblıkasy Bas Prokýrorynyń orynbasary Ashat Jumaǵalıuly JUMAǴALI dúnıege keldi.
Arqalyq qalasynda týǵan. 2000 jyly E.A. Bóketov atyndaǵy Qaraǵandy memlekettik ýnıversıtetin bitirgen.
Eńbek joly. 2001-2010 jyldary prokýratýra organdarynda túrli qyzmet — Astana qalasy prokýratýrasynyń bas mamany, QR Bas prokýratýrasynyń Aldyn ala tergeý jáne anyqtaý zańdylyǵyn qadaǵalaý basqarmasynyń prokýrory, aǵa prokýrory, QR Bas Prokýrorynyń aǵa kómekshisi laýazymdaryn atqarǵan. 2012-2014 jyldary QR Ekonomıkalyq qylmyspen jáne sybaılas jemqorlyqpen qarsy kúres agenttigi (qarjy polıtsııasy) tóraǵasynyń keńesshisi, Tergeý departamenti jáne sybaılas jemqorlyq týraly isterdi ashý jáne aldyn alý departamenti bastyǵynyń birinshi orynbasary, Tergeý departamentiniń bastyǵy, 2014-2016 jyldary QR Bas Prokýrorynyń aǵa kómekshisi, 2016-2018 jyldary QR Bas prokýratýrasy janyndaǵy Quqyq qorǵaý organdary akademııasy Vedomstvoaralyq ǵylymı-zertteý ınstıtýty dırektorynyń orynbasary, dırektory, 2018-2019 jyldary QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Sybaılas jemqorlyqqa qarsy is-qımyl ulttyq bıýrosy (Sybaılas jemqorlyqqa qarsy qyzmet) Tergeý departamenti basshysynyń orynbasary, 2019 jyly QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Sybaılas jemqorlyqqa qarsy is-qımyl ulttyq bıýrosynyń (Sybaılas jemqorlyqqa qarsy qyzmet) Soltústik Qazaqstan oblysy boıynsha departamentiniń basshysy, 2019-2021 jyldary QR Sybaılas jemqorlyqqa qarsy is-qımyl agenttiginiń (Sybaılas jemqorlyqqa qarsy qyzmet) Shymkent qalasy boıynsha departamentiniń basshysy, 2021-2022 jyldary QR Sybaılas jemqorlyqqa qarsy is-qımyl agenttiginiń (Sybaılas jemqorlyqqa qarsy qyzmet) Sotqa deıingi tergeý qyzmetiniń basshysy, 2022-2023 jyldary QR Sybaılas jemqorlyqqa qarsy is-qımyl agenttigi (Sybaılas jemqorlyqqa qarsy qyzmet) tóraǵasynyń orynbasary, 2023-2025 jyldary QR Sybaılas jemqorlyqqa qarsy is-qımyl agenttiginiń (Sybaılas jemqorlyqqa qarsy qyzmet) tóraǵasy laýazymyn atqarǵan.
Qazirgi qyzmetine 2025 jylǵy qazan aıynda taǵaıyndaldy.
І jáne II dárejeli «Aıbyn» ordenimen, mereıtoılyq jáne vedomstvolyq nagradalarmen marapattalǵan.
46 jyl buryn (1980) Qazaqstan Respýblıkasy ІІM Maqan Esbolatov atyndaǵy Almaty akademııasynyń bastyǵy Qalıjan Jeńisbekuly QOBLANDIN dúnıege keldi.
Qyzylorda oblysynda týǵan. 2001 jyly M. H. Dýlatı atyndaǵy Taraz memlekettik ýnıversıtetin, 2006 jyly RF ІІM basqarý Akademııasyn támamdaǵan.
Іshki ister organdaryndaǵy qyzmetin 2002 jyly Batys-Qazaqstan oblysynyń ІІB 9-shy basqarmasy ekonomıkalyq qaýipsizdik bóliminiń jedel ýákili laýazymynan bastaǵan. 2002-2016 jyldary ishki ister organdarynda ártúrli orta jáne aǵa basshylyq quram laýazymdarynda qyzmet atqarǵan. 2016-2017 jyldary Qyzylorda oblysynyń ІІD Jergilikti polıtsııa qyzmetiniń bastyǵy, 2017-2019 jyldary Qyzylorda oblysy ІІD bastyǵynyń orynbasary, 2019-2023 jyldary Kóliktegi polıtsııa departamenti bastyǵynyń birinshi orynbasary, 2023-2024 jyldary QR ІІM M.Esbolatov atyndaǵy Almaty akademııasy bastyǵynyń orynbasary qyzmetinde boldy.
Qazirgi laýazymyn 2024 jylǵy jeltoqsannan bastap atqaryp keledi.
75 jyl buryn (1951-2025) belgili sýretshi, Qazaqstannyń eńbek sińirgen qaıratkeri, Memlekettik syılyqtyń laýreaty, professor Aǵymsaly Dúzelhanuly DÚZELHANOV dúnıege keldi.
Qyzylorda oblysynyń Qazaly qalasynda týǵan. 1976 jyly Almaty kórkemsýret ýchılışesin, 1982 jyly V. I. Sýrıkov atyndaǵy Máskeý kórkemsýret ınstıtýtyn bitirgen. Qoldanbaly grafıka, plakat, kitap bezendirý, keskindeme, portret janrlary boıynsha eńbek etken.
Tarıhı, folklorlyq taqyryptaǵy jáne balalarǵa arnalǵan 200-den astam kitapty bezendirgen. «Altyn sarbaz», «Túrkistan», «Ordabasy», «Oǵyz han», «Kóroǵly» jáne t. b. keskindeme týyndylarynyń, sondaı-aq Abylaı han, Ábilqaıyr han, Qazybek bı, Áıteke bı, Tóle bı, Qorqyt jáne t. b. portretter serııasynyń avtory.
Sýretshiniń týyndylary Qazaqstannyń jáne shet elderdiń óner murajaılaryna qoıylǵan.
