19 shildede QR tólemderdiń biryńǵaı bankaralyq júıesi iske qosylady
ASTANA. KAZINFORM — Bıyl 19 shildeden bastap QR tólemderdiń biryńǵaı bankaralyq júıesi iske qosylady. Bul týraly Senattyń jalpy otyrysynda Ulttyq bank tóraǵasy Tımýr Súleımenov aıtty.
— Bıyl 19 shildeden bastap QR tólemderdiń biryńǵaı bankaralyq júıesi iske qosylady. Parlamenttiń qoldaýy arqasynda osy jyldyń 1 mamyrynan bastap ekonomıkanyń jańa salasy — tsıfrlyq aktıvter ındýstrııasyn iske qosýdyń quqyqtyq negizi qalandy. Zamanaýı, aıqyn jáne ınstıtýtsıonaldy orta quryldy. Ulttyq banktiń retteý ortasy bazasynda tsıfrlyq qarjy aktıvteri salasynda 30-dan astam ınnovatsııalyq joba iske qosyldy. Osy jyl Ulttyq qordyń aktıvterin jańa nysanaly lokatsııalaýǵa kóshirýdi josparlap otyrmyz. Aktsııalar men balamaly quraldar sııaqty kiristiligi joǵary aktıvterdiń úlesin ulǵaıtamyz, — dedi Tımýr Súleımenov Úkimettiń ótken jylǵy respýblıkalyq bıýdjettiń atqarylýy týraly esebin talqylaý barysynda.
Onyń aıtýynsha, bul Ulttyq qordyń kiristiligine áser etedi.
— Sonymen qatar halyqaralyq tájirıbeni eskere otyryp, Ulttyq bank Ulttyq qordyń 1 mlrd dollarǵa deıingi mólsherdegi qarajatyn ulttyq ekonomıkanyń joǵary tehnologııalyq sektorlaryna ınvestıtsııalaý baǵdarlamasyn bekittik. Munan bólek, aktıvterdiń kiristiligin ártaraptandyrýdy jáne ulǵaıtýdy qamtamasyz etý úshin Ulttyq bank ınvestıtsııalardyń 1 mlrd dollar mólsherindegi nysanaly kóleminiń ulttyq strategııalyq krıptorezerv qurdy. Qazaqstan osyndaı qordy qurǵan álemdegi alǵashqy elderdiń biri ekenin atap ótken jón, — dedi ol.
Aıta keteıik, 2025 jyly elimizdiń altyn-valıýta rezervteri 42,8 paıyzǵa ósti.
