19 sheteldik kásiporyn Qazaqstanǵa kóshirildi

ASTANA. QazAqparat - 19 sheteldik kásiporyn Qazaqstanǵa kóshirildi. Bul týraly Úkimettiń keńeıtilgen otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Birqatar sheteldik kásiporyndy Qazaqstanǵa relokatsııalaý jumysy júrgizilip jatyr. Búginde 19 kompanııa kóshirildi. Qalǵandary pysyqtalý ústinde», - dedi Úkimet basshysy.

Premer-Mınıstrdiń aıtýynsha, saılaýaldy baǵdarlamaǵa sáıkes, aldaǵy 7 jyldyń ishinde 150 mlrd dollardan astam tikeleı sheteldik ınvestıtsııa tartý jumysy júrgizilip jatyr. Osy jyldyń І jartyjyldyǵynyń qorytyndysynda elimizge 14,5 mlrd dollar ınvestıtsııa tartyldy. Bul ótken jylǵy kórsetkishten 28 paıyzǵa artyq.

«131 myń jańa jumys ornyn qurýdy kózdeıtin, somasy 30 trln teńge bolatyn 850 ınvestıtsııalyq jobadan turatyn jalpyulttyq pýlmen jumys istelip jatyr. Osy jyldyń qorytyndysynda 2 trl teńgeniń 190 jobasy paıdalanýǵa beriledi», - dedi Álıhan Smaıylov.