19 myńnan astam qazaqstandyq ıpotekalyq qaryzdaryn qaıta qarjylandyrýǵa ótinim berdi
ALMATY. QazAqparat - 19 myńnan astam qazaqstandyq ıpotekalyq qaryzdaryn qaıta qarjylandyrýǵa ótinim berdi. Bul týraly QR Ulttyq Bankiniń Tóraǵasy Danııar Aqyshev Aqtóbe qalasyna jumys sapary barysynda málimdedi.
«2016 jylǵy 1 naýryzdaǵy jaǵdaı boıynsha bankterge búkil Qazaqstan boıynsha Ipotekalyq qaryzdardy qaıta qarjylandyrý baǵdarlamasy sheńberinde 19 myńnan astam ótinim tústi. Olardyń ishinde quny 76 mlrd teńge bolatyn 12 421 ótinim maquldandy», - dedi ol.
Onyń aıtýynsha, Ulttyq Bank bólingen qarajatty ıgerý qarqynyn ulǵaıtý maqsatynda sharalar qabyldaýda. Aqtóbe oblysy boıynsha berilgen ótinimder sany 1 136 ótinimdi quraıdy. Onyń ishinde 3,7 mlrd teńge bolatyn 760 ótinim maquldandy.
Ulttyq Bank Basqarmasynyń taıaýdaǵy otyrysyna bankterdiń qarajatty ıgerý kezeńin 2016 jylǵy 1 jeltoqsanǵa deıin uzartýdy, bankter men qarjy uıymdaryn (onyń ishinde «Qazaqstan ıpotekalyq kompanııasy» AQ) tizimin keńeıtýdi, sondaı-aq basqa da ózgeristerdi qosa alǵanda baǵdarlamany odan ári jetildirý boıynsha birqatar usynystar shyǵarylady.
«Biz qaryz alýshylarǵa problemalyq bereshegin óteýge, atap aıtqanda bankterde Ulttyq Banktiń, ákimdiktiń ókilderiniń jáne bankterdiń basshylyǵynyń qatysýymen jeke kezdesýler uıymdastyrý, sondaı-aq qaryzdy óteýge múmkindigi joq qaryz alýshylardy jumysqa ornalastyrý máselelerin qaraý arqyly járdem etý boıynsha oblystyq ákimdikpen jumysymyzdy jandandyrýdy josparlap otyrmyz.
Barlyq osy máseleler boıynsha biz Úkimetpen jáne jergilikti bılik organdarymen budan ári birlesip jumys isteýge daıynbyz», - dedi Ulttyq bank basshysy.
Aıta ketý kerek, Ulttyq Bank ıpotekalyq turǵyn úı qaryzdaryn qaıta qarjylandyrý baǵdarlamasyn Memleket basshysynyń tapsyrmasy boıynsha júzege asyryp jatyr.
