19 mlrd teńge zańsyz kiris: «Aktıv Lombard» isine qatysty tergeý aıaqtaldy
ASTANA. KAZINFORM - Qazaqstan Respýblıkasy Qarjylyq monıtorıng agenttigi zańsyz kásipkerlik qyzmet jáne qylmystyq jolmen alynǵan kiristerdi zańdastyrý faktileri boıynsha S.S. Koınov pen basqa da qatysy bar tulǵalarǵa qatysty tergeýdi aıaqtady.
Eske salsaq, ótken jyldyń qyrkúıek aıynda komıssııalyq dúken retinde jasyrynǵan iri lombardtar jelisi arqyly zańsyz mıkrokredıt berý shemasy anyqtalǵan bolatyn.
«Aktıv Lombard» jelisiniń ıesi S.S. Koınov komıssııalyq qyzmetti paıdalana otyryp, jeke tulǵalarǵa jasyryn túrde mıkrokredıt berýdiń zańsyz shemasyn uıymdastyrdy degen kúdikke ilindi.
Qyzmetine zańdyq sıpat berý úshin S.S. Koınov materıaldyq-tehnıkalyq bazasy men ákimshilik resýrstary bar ózine baǵynysty «Aktıv Lombard» JShS-in paıdalanyp, senimdi tulǵalardyń atyna tirkelgen jáne formaldy túrde komıssııalyq saýdamen aınalysqan «One Billion Sales», «The Best Seller» jáne «Shark in Sales» JShS sııaqty baılanysy bar zańdy tulǵalar jelisin qurdy.
Atalǵan kompanııalar «Aktıv Market» biryńǵaı brendimen áreket etip, is júzinde múlikti kepilge alyp, joǵary paıyzdyq mólsherlememen mıkrokredıtter berý úshin paıdalanylǵan. Komıssııalyq bólimsheler «Aktıv Lombard» JShS fılıaldarymen bir ǵımaratta ornalasqan, al klıentterge qyzmet kórsetýdi birdeı qyzmetkerler júzege asyrǵan.
Klıenttermen jasalǵan komıssııalyq sharttar formaldy jáne jalǵan sıpatta bolǵan. Syıaqy mólsherlemesiniń ortasha deńgeıi táýligine 1,73%-dan 2,07%-ǵa deıin jetip, belgilengen normadan (0,3%) 5 esege joǵary bolǵan, bul azamattardyń quqyqtarynyń eleýli buzylýyna ákelgen. Nátıjesinde 1,9 mln-nan astam shart jasalyp, qylmystyq kiris kólemi 19 mlrd teńgeden asqan.
Tergeý materıaldaryna sáıkes, qylmystyq kiristerdiń shyǵý kózin jasyrý maqsatynda S.S. Koınov olardy zańdastyrýdyń kóp deńgeıli shemasyn ázirlep, iske asyrǵan. Ol úshin baılanysy bar kompanııalarmen jasalǵan jalǵan sharttar, sondaı-aq banktik shottar arasynda aqshany birneshe ret aýdarý arqyly keıinnen dıvıdend túrinde shyǵarý paıdalanylǵan.
Osy tásilmen 5 mlrd teńgeden astam qarajat shyǵarylǵan. Sonymen qatar, S.S. Koınov baǵdarlamalyq qamtamasyz etý ázirleý salasynda formaldy túrde qyzmet kórsetken «Zeus Co» JShS-in tirkegen. Baǵdarlamalyq qamtamasyz etýdi engizý jáne súıemeldeý qyzmetteri kórsetildi degen jeleýmen baılanysy bar kompanııalarmen quny asyra kórsetilgen sharttar jasalyp, nátıjesinde «Zeus Co» JShS shottaryna 2,5 mlrd teńge túsken, onyń 2,2 mlrd teńgesi S.S.Koınovqa dıvıdend túrinde aýdarylǵan.
Sot sanktsııasymen konfıskatsııalaý maqsatynda jalpy quny 8,9 mlrd teńge bolatyn jyljymaly jáne jyljymaıtyn múlikke, jarǵylyq kapıtaldaǵy úlesterge jáne zergerlik buıymdarǵa tyıym salyndy. Tyıym salynǵan múlik qatarynda: elordadaǵy 4 páter jáne 2 turǵyn úı, BAÁ-degi 4 apartament, 6 avtokólik, onyń ishinde Lexus LX 600, Rolls Royce Cullinan, Mercedes-Benz G63, Bentley Bentayga V8, Land Rover Range Rover Sport, sondaı-aq depozıttik shottardaǵy 2,7 mlrd teńge kólemindegi aqshalaı qarajat bar. S.S. Koınov qamaýǵa alyndy. Onyń tórt sybaılasyna qatysty elden shyqpaý jáne tıisti minez-qulyq týraly qolhat túrindegi bultartpaý sharasy qoldanyldy. Qazaqstan Respýblıkasy QPK 201-babyna sáıkes ózge aqparat jarııa etilmeıdi.
Osyǵan deıin Qarjylyq monıtorıng agenttigi bloger Mellstroy-ǵa qatysty tergeýdi bastaǵany týraly jazdyq.