1,9 mlrd teńge: Arqalyqta qaıtarylǵan aktıvter esebinen ýnıversıtettiń oqý korpýsy rekonstrýktsııalandy
ASTANA. KAZINFORM – Qostanaı oblysy Arqalyq qalasynda Ybyraı Altynsarın atyndaǵy Arqalyq pedagogıkalyq ýnıversıtetiniń zamanaýı oqý korpýsyna qaıta beıimdelgen ǵımaratty rekonstrýktsııalaý jumystary aıaqtaldy.
Oblystyq prokýratýra málimetinshe, jobanyń quny 1,9 mlrd teńge. Joba prokýratýra organdarynyń zańsyz shyǵarylǵan aktıvterdi memleketke qaıtarý jónindegi jumysy aıasynda memleketke qaıtarylǵan aktıvterden qalyptastyrylǵan Arnaýly memlekettik qordyń qarajaty esebinen júzege asyryldy.
– Buǵan deıin ǵımarat uzaq ýaqyt boıy óz maqsatyna paıdalanylmaǵan. Rekonstrýktsııadan keıin munda 2,5 myńǵa jýyq stýdenttiń bilim alýyna jáne oqytýshylardyń jumys isteýine zamanaýı jaǵdaı jasaldy. Osylaısha, memleketke qaıtarylǵan aktıvter naqty áleýmettik maqsattarǵa baǵyttalyp, bilim berýdi damytýǵa, jastarǵa zamanaýı jaǵdaı jasaýǵa jáne túptep kelgende, halyqtyń ıgiligine qyzmet etip jatyr, - delingen habarlamada.
Arqalyq qalasynyń prokýratýrasy jobanyń iske asyrylýynyń zańdylyǵyna qadaǵalaýdy júzege asyrady, sondaı-aq bólingen memlekettik qarajattyń maqsatty ári tıimdi paıdalanylýyn baqylaýda ustaıdy.
Buǵan deıin qaıtarylǵan aktıvter esebinen túsken qarjynyń basym bóligi qaı óńirlerge jumsalǵanyn jazǵan edik.
