19 myńnan astam taksı júrgizýshisi qyzmetin zańdastyrdy – Eńbek mınıstri

ASTANA. KAZINFORM – Qazaqstanda avtomattandyrylǵan jumys ornyn engizip, eńbek jáne ujymdyq sharttar jasasýdyń tsıfrlyq formatyna kóshý josparlanýda. Bul týraly Eńbek jáne halyqty áleýmettik qorǵaý mınıstri Svetlana Jaqypova aıtty. 

«Bizdiń basymdyqtarymyzdyń biri – eńbek qatynastaryn deklaratsııalaý. Birinshiden, kásipodaqtardyń avtomattandyrylǵan jumys ornyn engizip, eńbek jáne ujymdyq sharttar jasasýdyń tsıfrlyq formatyna kóshý josparlanýda. Osy zańnyń tıisti jobasy ázirlenip, qazan aıynyń sońyna deıin sizderdiń qaraýyńyzǵa engiziledi», - dedi mınıstr Májiliste «Qazaqstannyń eńbek naryǵyn damytý jáne kadrlyq áleýetin nyǵaıtý» atty Úkimet saǵatynda.

Onyń aıtýynsha, pılottyq rejımde elektrondy formatta 8,7 myńnan astam eńbek sharty jasalǵan. Jumyskerlerdiń quqyqtaryn qorǵaýǵa kómektesetin 8 myń ujymdyq shart týraly derekter mınıstrliktiń aqparattyq júıesine engizildi.

Ekinshiden, elektrondyq shtattyq keste jobasy iske asyrylýda – bul aqparattyq júıelerdegi barlyq jumys oryndaryn kodtaıdy, eńbek resýrstaryn, jumys oryndaryn qurý jáne eńbek jaǵdaılaryn qalyptastyrý protsesin dál esepke alýǵa múmkindik beredi.

«Úshinshiden, ońaılatylǵan tirkeý rásimin engize otyryp, platformalyq jumyspen qamtýdy retteý zańnamalyq túrde engizildi. Pılottyq joba aıasynda 19 myńnan astam taksı júrgizýshisi qosylyp, 20 mln astam fıskaldyq chek jazyldy. Bul – platformalyq jumysshylardy áleýmettik jáne zeınetaqymen qamsyzdandyrý júıesine zańdastyrý men ıntegratsııalaýdyń mańyzdy qadamy», - dedi Eńbek mınıstri.

Buǵan deıin S. Jaqypova eldegi kóleńkeli jumys oryndary máselesin kótergen edi.