19 myń pedagog bas qosty: Astanada jańa oqý jylyndaǵy basty mindetter aıqyndaldy
ASTANA. KAZINFORM — Astanada jańa oqý jylyna daıyndyq aıasynda pedagogterdiń kásibı yntymaqtastyǵyn nyǵaıtýǵa jáne bilim berý sapasyn arttyrýǵa baǵyttalǵan Biryńǵaı ádistemelik keńes ótti, dep habarlaıdy elorda ákimdiginiń resmı saıty.
«Bilim berý júıesiniń strategııalyq damýy: konstıtýtsııalyq qundylyqtar, jasandy ıntellekt jáne adamı kapıtal» taqyrybyndaǵy Tamyz forýmy aıasynda uıymdastyrylǵan keńeske 19 myńnan astam pedagog qatysty.
Kezdesý barysynda 2026-2027 oqý jylyndaǵy bilim berý júıesiniń negizgi basymdyqtary talqylandy. Atap aıtqanda, konstıtýtsııalyq qundylyqtardy bilim berý úderisine kiriktirý, «Adal azamat», «Zań men tártip», «Taza Qazaqstan» qaǵıdattaryn iske asyrý, bilim sapasyn arttyrý jáne oqýshylardyń fýnktsıonaldyq saýattylyǵyn damytý máselelerine basymdyq berildi.
Sonymen qatar tsıfrlyq transformatsııa jaǵdaıynda jasandy ıntellekt múmkindikterin tıimdi paıdalaný, pedagogterdiń kásibı damýyn qamtamasyz etý jáne ádistemelik yntymaqtastyqty kúsheıtý baǵyttary qarastyryldy.
— Keńestiń praktıkalyq bóliminde pedagogter kásibı toptarǵa bólinip, naqty mindetter boıynsha jumys júrgizdi. Nátıjesinde «Ádistemelik sheshimder kartasy» ázirlendi. Qujatta memlekettik basymdyqtardy oqý pánderi arqyly júzege asyrýdyń naqty tetikteri aıqyndalyp, mektepterdiń ádistemelik jumysyn jetildirýge baǵyttalǵan usynystar qalyptastyryldy, — delingen ákimdik taratqan aqparatta.
Biryńǵaı ádistemelik keńes qorytyndysynda jańa oqý jylynda ádistemelik jumysty uıymdastyrýdyń ortaq tásilderi belgilendi. Pedagogter úshin sapaly bilim berýdi qamtamasyz etý, qundylyqqa negizdelgen tárbıe júıesin nyǵaıtý, kásibı damýdy jalǵastyrý jáne zamanaýı tsıfrlyq múmkindikterdi tıimdi paıdalaný basty mindetter retinde aıqyndaldy.
Osylaısha, Biryńǵaı ádistemelik keńes jańa oqý jylynda elordalyq bilim berý uıymdarynyń ádistemelik jumysyn birizdendirip, pedagogterdiń tájirıbe almasýyna jáne bilim berý úderisin zamanaýı talaptarǵa saı jetildirýge múmkindik beretin mańyzdy alańǵa aınaldy.
Buǵan deıin Aqtóbe mektepterinde 400-ge jýyq pedagogtiń orny bos turǵany aıtyldy.
