1,9 myń gektar aýyl sharýashylyǵy jeri memleket menshigine qaıtaryldy
ASTANA. KAZINFORM - Soltústik Qazaqstan oblysynyń Aqqaıyń aýdanynda jalpy aýdany 1,9 myń gektar bolatyn aýyl sharýashylyǵy maqsatyndaǵy jaıylymdyq jerlerdiń paıdalanylmaı jatqany anyqtaldy.
QR Aýyl sharýashylyǵy mınıstrligi baspasóz qyzmetiniń habarlaýynsha, bul zań buzýshylyq Aýyl sharýashylyǵy mınıstrligi Jer resýrstaryn basqarý komıtetiniń Jer resýrstaryn basqarý departamenti júrgizgen tekserý nátıjesinde belgili boldy.
Elimizdiń jer zańnamasyna sáıkes, sharýa nemese fermer qojalyǵyn júrgizý ne aýyl sharýashylyǵy óndirisin júzege asyrý úshin berilgen jer telimderi paıdalanylmaı jatqany anyqtalǵan kúnnen bastap bir jyl ishinde nysanaly maqsatyna saı paıdalanylmasa, zańda belgilengen tártippen májbúrlep alyp qoıýǵa jatady.
-Anyqtalǵan zań buzýshylyqty joıý jáne zańdylyqty qalpyna keltirý maqsatynda departament Soltústik Qazaqstan oblysynyń mamandandyrylǵan aýdanaralyq ekonomıkalyq sotyna jer ýchaskesin májbúrlep alyp qoıý týraly talap aryz berdi. Sot departamenttiń talap aryzyn tolyqtaı qanaǵattandyrdy. Nátıjesinde jer ýchaskesi memleket menshigine qaıtaryldy,-delingen habarlamada.
Paıdalanylmaı jatqan aýyl sharýashylyǵy jerlerin memleket menshigine qaıtarý jumystary jalǵasýda.
Osyǵan deıin Aqtóbede quny 1,7 mlrd teńgeden asatyn jer ýchaskeleri memleketke qaıtarylǵany týraly jazdyq.
