19 maýsymda Alakóldi ashý josparlanyp otyr

NUR-SULTAN. QazAqparat - «QTJ» UK» AQ basqarma tóraǵasynyń birinshi orynbasary Qanat Almaǵambetov Alakól 19 maýsymnan bastap ashylatynyn aıtty, dep habarlaıdy QazAqparat tilshisi.

«Ázirge, el azamattary Qazaqstannan tys saparlaı almaıdy, sondyqtan 1 maýsymnan Dostyq stansasy baǵytynda eki poıyzdyń qozǵalysy iske asyrylady. Al 10 maýsymnan keıin qalǵan poıyzdardyń qozǵalysyn jandandyramyz. Shyǵys Qazaqstan oblysy ákimdigimen ýaǵdalastyq boıynsha 19 maýsymnan Alakóldi ashý josparlanyp otyr. Biz osy jolaýshylar poıyzdaryn iske qosýdy josparladyq», - dedi ol Ortalyq kommýnıkatsııalar qyzmetinde.

Sonymen qatar tarıfter kóterilmeıtinin, bıletter burynǵy tarıfpen satylatynyn atap ótti.

«Tarıfter kóterilmeıdi. Biz dınamıkalyq baǵa qalyptastyrý júıesin alyp tastadyq. Ózderińiz bilesizder, buryndary jolaýshy 45 kún buryn bılet satyp alsa, onda basqa baǵa bolatyn. Al poıyz júrýge eki kún qalǵan kezde alǵanda bılettiń quny ózgeretin. Áleýmettik mańyzdy baǵdarlardaǵy dınamıkalyq baǵa qalyptastyrýdy toqtattyq», - dedi Qanat Almaǵambetov.