19 qarashada Senat otyrysynda tórt zań jobasy qaralady
ASTANA. QazAqparat - 19 qarashada bolatyn Senat otyrysynda tórt zań jobasyn qaraý josparlandy.
Senat Tóraǵasy Qasym-Jomart Toqaev jáne Palata Bıýrosynyń músheleri qabyldaǵan Qaýlyǵa sáıkes, senatorlar «Qazaqstan Respýblıkasynyń Joǵary Sot Keńesi týraly» konstıtýtsııalyq zań jobasyn jáne Joǵary Sot Keńesi, sot júıesi jáne sýdıalardyń mártebesi máseleleri jónindegi konstıtýtsııalyq zańdarǵa túzetýlerdi qaraýdy josparlady.
Odan basqa «Memlekettik satyp alý týraly» zań jobasy jáne zańnamaǵa memlekettik satyp alý máseleleri boıynsha túzetýler talqylaýǵa shyǵarylady.
Bıýroda Májilisten túsken zań jobalary bólindi.
Ekonomıkalyq saıasat, ınnovatsııalyq damý jáne kásipkerlik komıteti «Memlekettik satyp alý týraly» zań jobasy jáne zańnamaǵa memlekettik satyp alý máseleleri boıynsha túzetýler, sondaı-aq «Kólik quraly pasportynyń (kólik quralynyń shassıi pasportynyń) jáne ózi júretin mashına men tehnıkanyń basqa túrleri pasportynyń biryńǵaı nysandaryn engizý jáne elektrondyq pasporttar júıelerin uıymdastyrý týraly kelisimdi ratıfıkatsııalaý týraly» zań jobasy boıynsha bas komıtet bolyp belgilendi.
Konstıtýtsııalyq zańnama, sot júıesi jáne quqyq qorǵaý organdary komıtetine «Qazaqstan Respýblıkasynyń keıbir zańnamalyq aktilerine sporttyq-buqaralyq, mádenı oıyn-saýyq jáne basqa da is-sharalar ótkizý kezinde qaýipsizdikti qamtamasyz etý máseleleri boıynsha ózgerister men tolyqtyrýlar engizý týraly» zań jobasy pysyqtaýǵa berildi.
