Elordada 19 túlek Germanııa ýnıversıtetterinde tegin oqý múmkindigine ıe boldy
ASTANA. KAZINFORM — Astanadaǵy mektep túlekteri Germanııa, Aýstrııa jáne Shveıtsarııada oqý granttaryn aldy, dep habarlaıdy Astana ákimdigi.
Elordadaǵy «Balabaqsha — № 46 mektep-gımnazııasy» kesheninde nemis tilin meńgerýdiń joǵary deńgeıin (B2-den C1-ge deıin) dáleldegen oqý ornynyń 19 túlegine Deutsches Sprachdiplom II (DSD II) halyqaralyq dıplomdaryn saltanatty túrde tabystaý rásimi ótti. Bul dıplomdar oqýshylarǵa Germanııanyń úzdik ýnıversıtetterinde tegin bilim alýǵa múmkindik beredi.
Saltanatty is-sharaǵa Germanııanyń Qazaqstandaǵy elshiliginiń ókilderi qatysty. «Balabaqsha — № 46 mektep-gımnazııasy» kesheni elordada birden úsh tilde — qazaq, orys jáne nemis tilderinde oqytatyn jalǵyz oqý orny bolyp sanalady. Bilim berý mekemesiniń DSD-mektep mártebesine ıe bolǵanyna 20 jyldan asty, sonyń arqasynda onyń oqýshylary jyl saıyn sheteldik joǵary oqý oryndarynda bilimin jetildirý múmkindigine ıe bolyp keledi.
Bıyl túlekterdiń jartysyna jýyǵy Germanııa, Aýstrııa jáne Shveıtsarııa elderinde oqýǵa bilim berý granttary men joldamalar aldy. Oqýshylardyń biri oqýdyń barlyq shyǵynyn óteıtin tolyq grant ıegeri atandy.
— Balalardyń qolynda halyqaralyq úlgidegi sertıfıkattar bar, al búgin Germanııanyń Qazaqstandaǵy elshisi Iversen hanym olarǵa DSD II dıplomdaryn tabys etti. Bul — oqýshylardyń, pedagogtar men ata-analardyń kópjyldyq eńbeginiń nátıjesi, — dep atap ótti mektep dırektory Roza Qasqabaeva.
Onyń aıtýynsha, mekteptegi oqytýdyń ereksheligi — bastaýysh synyptardan bastap nemis tili tereńdetip oqytylady. Oqýshylar tórtinshi synypta-aq A1 deńgeıine, altynshy synypta A2 deńgeıine, segizinshi synypta B1 deńgeıine halyqaralyq emtıhan tapsyrady. Mektepti bitirgen kezde túlekter B2 jáne C1 deńgeılerin dáleldeıdi, bul olarǵa qosymsha tildik emtıhandar tapsyrmastan, Germanııanyń joǵary oqý oryndaryna túsýge quqyq beredi.
Bul joba Qazaqstan men Germanııa arasyndaǵy bilim berý salasyndaǵy yntymaqtastyqty nyǵaıtýdy jalǵastyra otyryp, qazaqstandyq mektep oqýshylaryna jańa akademııalyq jáne kásibı múmkindikter ashady.
Osydan buryn «Bolashaq» baǵdarlamasy boıynsha mektep túlekterine 20 stıpendııa beriletinin jazǵanbyz.
