19 elden kelgen oqýshylar: Almatydaǵy shahmat dodasy óz máresine jetti
ASTANA. KAZINFORM — Almaty qalasynda mektep oqýshylary arasyndaǵy World Schools Team Championship 2026 halyqaralyq komandalyq týrnıriniń Azııa kezeńi óz máresine jetti. Bul týraly Oqý-aǵartý mınıstrliginiń baspasóz qyzmeti málim etti.
Halyqaralyq shahmat federatsııasy (FIDE) men Halyqaralyq mektep shahmaty federatsııasynyń (ISCF) bastamasymen alǵash ret uıymdastyrylǵan bul sharanyń jabylý saltanatyna vedomstvonyń mınıstri Juldyz Súleımenova qatysty.
Saıysqa túrli memleketterden 26 mektep komandasy qatysyp, Azııa qurlyǵynyń eń úzdik jas zııatkerleri anyqtaldy.
— Memleket basshysy Qasym-Jomart Kemeluly Toqaev zııatker ultty qalyptastyrýdy el damýynyń negizgi strategııalyq basymdyqtarynyń biri retinde belgiledi. Búgingi týrnırdiń ótkizilýi osy baǵyttyń júıeli ári dáıekti túrde júzege asyrylyp jatqanynyń aıqyn dáleli bolyp tabylady. Shahmat oqý protsesine de, sabaqtan tys ýaqytqa da nyq enip, zamanaýı mektep ortasynyń mańyzdy bóligine aınaldy. Ol óskeleń urpaqtyń strategııalyq jáne logıkalyq oılaý qabiletin damytýǵa yqpal etedi, sondaı-aq tártipti nyǵaıtady, — dedi Oqý-aǵartý mınıstri Juldyz Súleımenova.
Juldyz Súleımenova atap ótkendeı, Qazaqstan shahmat federatsııasymen tyǵyz seriktestikte oqýshylardyń zııatkerlik áleýetin damytýǵa jáne el bolashaǵyn qalyptastyrýǵa baǵyttalǵan «Mekteptegi shahmat» baǵdarlamasy sátti júzege asyrylýda.
World Schools Team Championship 2026 týrnıriniń Azııa kezeńine Avstralııa, Úndistan, Qytaı, Sıngapýr, Ózbekstan jáne Reseı sııaqty 19 memleketten 8-14 jas aralyǵyndaǵy oqýshylar qatysty. Týrnırdiń basty ereksheligi — jarysqa tek jalpy bilim beretin mektepterdiń óz komandalary ǵana qatystyryldy.
Qazaqstan namysyn ulttyq irikteýdiń jeńimpazdary — Astana qalasyndaǵy «SEED Uniker School», Almaty qalasyndaǵy № 92 mamandandyrylǵan lıtseı jáne Respýblıkalyq fızıka-matematıka mektebiniń komandalary abyroımen qorǵady. Astanalyq SEED Uniker School komandasy úzdik tórttik quramyna kirdi. Al júldeli oryndardy Ózbekstan, Reseı jáne Úndistannan kelgen mektep oqýshylary ıelendi.
Tartysty ótken doda shveıtsarııalyq júıe boıynsha 8 týrdan turdy. Ár komanda tórt negizgi jáne bir qosalqy oıynshydan quralyp, qatysýshylarǵa ár partııaǵa 45 mınýt ýaqyt berildi.
Atalǵan shara Halyqaralyq shahmat federatsııasy (FIDE) men Halyqaralyq mektep shahmaty federatsııasynyń (ISCF) 2026 jyldy «Bilim berýdegi shahmat jyly» dep jarııalaýy aıasynda ótkizildi. Bul bastama oqýshylardyń synı oılaý qabiletin damytýdaǵy mańyzdy qadam boldy. Sonymen qatar jastar arasyndaǵy dostyqty nyǵaıtýǵa baǵyttalǵan.
Almatydaǵy Azııa kezeńinen ozyq shyqqan komandalar endi jeltoqsan aıynda ótetin Grand-fınalǵa joldama aldy. Aldaǵy ýaqytta mundaı irikteý kezeńderi Afrıka, Amerıka jáne Eýropa qurlyqtarynda jalǵasady.
Eske sala keteıik, 7-10 sáýir aralyǵynda Almaty qalasynda mektep oqýshylary arasynda ótken World Schools Team Championship 2026 halyqaralyq komandalyq týrnıriniń Azııa kezeńi boldy.
Bul týrnır Halyqaralyq shahmat federatsııasy FIDE jáne Mektep shahmatynyń halyqaralyq federatsııasy bastamasymen alǵash ret osyndaı formatta uıymdastyrylyp otyr jáne jahandyq jarystar tsıklin bastaıdy.
Jarysqa 19 elden 26 mektep komandasy qatysady. Olardyń qatarynda Avstralııa, Úndistan, Qytaı, Qazaqstan, Qyrǵyzstan, Malaızııa, Mońǵolııa, Jańa Zelandııa, Pákistan, Sıngapýr, Ózbekstan jáne basqa da elder bar. Sondaı-aq Bangladesh, Qytaıdyń Gonkong arnaıy ákimshilik aýdany, Nepal, Reseı, Tájikstan, Túrikmenstan, Fılıppın jáne Shrı Lanka elderiniń komandalary qatysady. Barlyq qatysýshylar- 8-14 jas aralyǵyndaǵy jalpy bilim beretin mektep oqýshylary.