19 bala qaza tapty: Gaıanada jataqhanany oqýshy qyz órtegen bolýy múmkin

DJORDJTAÝN. QazAqparat – Gaıanada 19 bala qaza tapqan jataqhanadaǵy órtti oqýshy uıymdastyrǵan bolýy yqtımal, dep habarlaıdy QazAqparat Deutsche Welle-ge siltememen.

«Joıqyn órtti oqýshy uıymdastyrýy múmkin. Ol órtti jataqhana komendanty men muǵalimi onyń uıaly telefonyn alyp qoıǵannan keıin qoıdy degen kúdik bar», - delingen resmı habarlamada.

Patologoanatomnyń qorytyndysyna sáıkes, 6 adam tútinnen ýlanyp jáne kúıik shalyp qaza tapty. 13 adamnyń máıiti Gaıananyń astanasy Djordjtaýnǵa saraptamaǵa jiberildi.

30 bala aýrýhanaǵa jatqyzyldy.

Dúısenbide el prezıdenti Irfaan Alı úsh kúnge aza tutý jarııalady. Ol Mahdı aýrýhanasyndaǵy balalarǵa baryp, qaza tapqandardyń ata-anasymen kezdesti.

Úkimettegi belgisiz derekkóz AFP agenttigine Mahdı aýdandyq aýrýhanasynda qyzdy polıtsııa kúzetip otyrǵanyn habarlaǵan, ol qyz órt qoıǵanyn moıyndaǵan.

«Olar (jataqhana qyzmetkerleri) qyzdyń uıaly telefonyn alyp qoıǵan, keıin ǵımaratty órteıtinin aıtyp, qorqytqan. Muny bári estigen», - dedi derekkóz.

Eske salaıyq, Mahdı qalasyndaǵy orta mektep jataqhanasynda órt dúısenbi kúni túnde, balalar uıyqtap jatqanda shyqqan. Sol kezde ǵımaratta 57 oqýshy bolǵan.

Gaıana – Ońtústik Amerıkanyń soltústik-shyǵysyndaǵy memleket, ol Venesýela men Sýrınam arasynda ornalasqan.