189 jumysqa alý tártibin buzý faktisi anyqtaldy – Eńbek mınıstrligi
ASTANA. KAZINFORM – QR Eńbek jáne halyqty áleýmettik qorǵaý vıtse-mınıstri Asqarbek Ertaev shetelge jumys isteýge ketetin qazaqstandyqtardyń quqyǵyn qorǵaý boıynsha qabyldanyp jatqan sharalar týraly aıtyp berdi.
QR Syrtqy ister mınıstrliginde Qazaqstanda akkredıttelgen dıplomatııalyq korpýs ókilderi úshin «Adam saýdasyna qarsy is-qımyldyń ózekti máseleleri» taqyrybynda brıfıng ótti. Іs-sharaǵa Ortalyq Azııa elderinde úılestirý fýnktsııasyn atqaratyn Halyqaralyq kóshi-qon uıymynyń Qazaqstandaǵy ókildigi qatysty.
Asqarbek Ertaevtyń aıtýynsha, Qazaqstan azamattaryn shetelde jumysqa ornalastyrýda qaýipsizdikti arttyrý úshin keshendi sharalar júzege asyrylyp jatyr.
– Shetelge jumys isteýge ketetin qazaqstandyqtardyń eńbek jáne áleýmettik quqyqtaryn sol el aýmaǵynda qorǵaýǵa baǵyttalǵan halyqaralyq kelisimder jasalyp jatyr. Qazirgi tańda Qatar jáne Ulybrıtanııamen kelisimderge qol qoıyldy, Ońtústik Koreıamen negizdemelik memorandým jasaldy. Sondaı-aq BAÁ, Saýd Arabııasy, Japonııa jáne basqa da birqatar elmen kelisimder pysyqtalý ústinde, - dedi ol.
Sondaı-aq ol memleket eńbek zańnamasynyń saqtalýyn profılaktıkalyq tekserýler arqyly baqylaıtynyn aıtty. Tek 2024 jyldan beri eńbek ınspektorlary 1 802 is-shara ótkizgen, onyń ishinde 386-sy — 2025 jyldyń birinshi toqsanynda júrgizildi.
– Bul tekserýler barysynda májbúrli eńbek pen adam saýdasyna qatysty quqyqbuzýshylyq faktileri tirkelmedi. Alaıda eńbek sharty jasalmaǵan jumys kúshin paıdalaný faktisi boıynsha 189 derek anyqtaldy. Barlyq quqyq buzýshylar ákimshilik jaýapqa tartyldy. Bul baǵyttaǵy jumys jalǵasýda jáne mınıstrliktiń turaqty baqylaýynda bolady, - dep atap ótti vıtse-mınıstr.
Aıta keteıik, buǵan deıin elimizde adam saýdasyna qatysty zańnamalyq baza kúsheıtilgenin jazǵan edik.