1883 muǵalimge suranys bar - B. Jumaǵulov
ASTANA. 14 tamyz. QazAqparat - Elimizdegi pedagog kadrlardyń suranysy boıynsha, 1883 muǵalim tapshy. Bul týraly búgin Úkimette ótken selektorlyq keńeste QR Bilim jáne ǵylym mınıstri Baqytjan Jumaǵulov málim etti.
Mınıstrdiń aıtýynsha, búgingi kúni elimizde jalpy 293 myńnan astam muǵalim qyzmet etedi. «Bul rette rezervter túbegeıli paıdalanylyp jatqan joq ekendigin aıtqym keledi. Bıyl biz alǵash ret aýyldyq kvotamen bilim alǵan joǵary oqý oryndaryn bitirýshi túlekterdi óńirlerge bóldik. Olar óńirlerde eńbek etýge mindetti bolǵan edi. Alaıda, keıbir jaǵdaılarda qajetti sharalardyń qamtamasyz etilmeýi saldarynan, bundaı túlekter bólingen oryndarǵa bara almaı otyr. Sol úshin ondaı mamandardyń óńirlerdegi mektepterde jumys jasaýyna qajetti jaǵdaıdy qarastyrýǵa tıispiz», - dedi Bilim mınıstri.
