1879 dıqan erte qarjylandyrý arqyly egis jumystaryna kiristi
ASTANA. KAZINFORM — Bıylǵy kóktemgi dala jumystaryna arnalǵan erte qarjylandyrý baǵdarlamasyn júzege asyrý qarqyndy jalǵasyp otyr. Baǵdarlama boıynsha ótinim qabyldaý 2025 jylǵy qazanda bastalǵan bolatyn. Aýyl sharýashylyǵy ónimin óndirýshiler úshin syıaqy mólsherlemesi jylyna 5 paıyzdy quraıdy. Bul týraly vedomstvonyń baspasóz qyzmeti málim etti.
Búgingi kúni 2429 aýyl sharýashylyǵy ónimin óndirýshiden 312,4 mıllıard teńge kóleminde ótinimder irikteldi. Qazirgi ýaqytqa deıin 200 mıllıard teńge somasyna 1879 ótinim qarjylandyrylyp, 2,4 mıllıon gektar egis alqaby qamtyldy.
Sonymen qatar «Damý» qory arqyly qaryzdarǵa kepildik berý tetigi iske asyrylýda, ol nesıe somasynyń 85 paıyzyna deıin kepildikpen qamtamasyz etýge múmkindik beredi. Qazirgi tańda 86 mıllıard teńge somasyna 526 kepildik berildi.
«Keń dala 2» baǵdarlamasy boıynsha ótinim qabyldaý Memleket basshysynyń kóktemgi dala jumystaryn ýaqtyly ári sapaly júrgizýdi qamtamasyz etý jónindegi tapsyrmasyna sáıkes 1 qazanda bastaldy.
— Qarjylandyrýdyń erte bastalýy dıqandarǵa 2026 jylǵy egis naýqanyna aldyn ala daıyndalýǵa múmkindik beredi. Qarajat janar-jaǵarmaıdy tıimdi baǵamen satyp alýǵa, mıneraldy tyńaıtqyshtar alýǵa, aýyl sharýashylyǵy tehnıkasyn jóndeýge jáne qajetti tuqym qoryn qalyptastyrýǵa baǵyttalmaq, — delingen habarlamada.
Jeńildikti qarjylandyrý kóktemgi dala jumystaryn daıyndaý men ótkizýge ǵana emes, sondaı-aq oraq naýqanyna jáne maýsymdyq shyǵyndardy óteýge de qoljetimdi. Qarajat el boıynsha Agrarlyq nesıe korporatsııasynyń óńirlik bólimsheleri jáne seriktes qarjy uıymdary arqyly beriledi.