187 myń adam qańtar aıynda ótetin UBT-ǵa qatysý úshin ótinish berdi
ASTANA. KAZINFORM – 2026 jylǵy qańtar aıynda ótetin UBT-ǵa qatysý úshin ótinish qabyldaý aıaqtaldy. 187 myńǵa jýyq adam testileýden ótýge nıet bildirdi, bul ótken jylmen salystyrǵanda 20 myńǵa kóp. UBT 10 qańtar men 10 aqpan aralyǵynda ótedi. Bul týraly Ǵylym jáne joǵary bilim mınıstriliginiń baspasóz qyzmeti habarlady.
Atap ótsek, talapkerler ótinish berý barysynda olar testileý kúnin, ýaqytyn jáne pýnktin ózderi tańdady.
UBT barysynda kalkýlıator, Hımııalyq elementterdiń perıodtyq júıesi (Mendeleev kestesi) jáne tuzdardyń erigishtik kestesi testileý baǵdarlamasynda qoljetimdi bolady. Test tapsyrýshylar testileý aıaqtalǵannan keıin 30 mınýt ishinde apellıatsııaǵa ótinish bere alady. Apellıatsııaǵa ótinish bergen testilenýshilerdiń sertıfıkaty appelıatsııalyq komıssııanyń sheshiminen keıin talapkerdiń jeke kabınetinde shyǵady.
2026 jyly Ulttyq biryńǵaı testileýdiń formaty ózgerissiz qalady. Talapkerler úsh mindetti pándi jáne tańdaýy boıynsha eki beıindik pándi tapsyrady. UBT tapsyrmalarynyń jalpy sany – 120. Onyń ishinde «Qazaqstan tarıhy» páni boıynsha 20 tapsyrma, «Oqý saýattylyǵy» men «Matematıkalyq saýattylyq» pánderinen 10 tapsyrmadan, sondaı-aq eki beıindik pánniń árqaısysynan 40 tapsyrmadan beriledi. UBT boıynsha eń joǵary ball da ózgermeıdi jáne 140 baldy quraıdy.
Testileý ýaqyty – 4 saǵat (240 mınýt). Bul rette erekshe bilim berý qajettilikteri bar balalar úshin usynylatyn qosymsha 40 mınýt ýaqyt saqtalatynyn aıta ketý kerek.
Esterińizge sala ketsek, qańtardaǵy UBT-ǵa shartty túrde aqyly negizde kúndizgi oqý nysany boıynsha joǵary oqý oryndaryna qabyldanǵandar, shyǵarmashylyq BBT-dan aqyly negizde basqa daıyndyq baǵyttaryna, pedagogıkalyq baǵytqa aqyly negizde aýysqysy keletinder, ótken jylǵy mektep jáne kolledj túlekteri, QR azamaty bolyp tabylmaıtyn ulty qazaq tulǵalar, shetelde bilim alǵan QR azamattary, sondaı-aq mektep bitiretin túlekter joǵary oqý oryndaryna aqyly negizde túsý úshin qatysady.
Eske sala keteıik, buǵan deıin qańtardaǵy UBT-ǵa ótinish qabyldaý aıaqtalýǵa jaqyn ekenin jazǵanbyz.