184 mln gektar jaıylymnyń 21 mln gektaryn ǵana paıdalanyp otyrmyz – Máýlen Áshimbaev

NUR-SULTAN. QazAqparat – QR Parlamenti Senatynda jaıylymdardy paıdalaný máselesin qozǵaıtyn eki birdeı zań jobasy tanystyryldy, dep habarlaıdy QazAqparat tilshisi.

Senat spıkeri Máýlen Áshimbaev «Qazaqstan Respýblıkasynyń keıbir zańnamalyq aktilerine jaıylymdardy paıdalaný máseleleri boıynsha ózgerister men tolyqtyrýlar engizý týraly» jáne «QR Salyq kodeksi jaıylymdardy paıdalaný máseleleri boıynsha tolyqtyrýlar engizý týraly» zań jobalary ne úshin ázirlenip jatqanyn túsindirdi.

«Qazirgi tańda halqymyzdyń 40 paıyzdan astamy aýyldy jerde turatyny belgili. Onyń kóbiniń negizgi tabysy da, kúnkóris kózi de qolyndaǵy jeke maly desek, artyq aıtqandyq bola qoımas. Alaıda sońǵy jyldardaǵy jaıylymnyń tapshylyǵy aýyl turǵyndary úshin úlken máselege aınalyp otyr. Memleket basshysy 2021 jylǵy Joldaýynda osy máselege arnaıy toqtalǵany belgili. Sol kezde Qasym-Jomart Kemeluly jaıylymdyq jerlerdi tıimdi paıdalanýǵa basa mán berdi. Sondaı-aq, jeke qosalqy sharýashylyqtardyń malyn jaıylymdyq jermen qamtamasyz etý máselesine aıryqsha nazar aýdarý qajettigin aıtty», - dedi Senat tóraǵasy.

Máýlen Áshimbaevtyń málimeti boıynsha, Qazaqstan jaıylym jer resýrstarynyń kólemi boıynsha álemde altynshy oryn alady.

«Elimizde jaıylym jerleriniń jalpy aýdany - 184,3 mln gektary. Biraq búgingi tańda osy kólemniń 21 mln gektarynda ǵana jeke qosalqy sharýashylyqtardyń malyn jaıýǵa múmkindik bar. Sonymen qatar, elimizdegi jaıylymdyq jerlerdiń ónimdiligi men sapasynyń nasharlaýy da úlken másele bolyp otyr. Oǵan jaıylymda jaıylatyn mal basynyń shekti deńgeıden asyp ketýi óz saldaryn tıigizýde. Alqaptardy shamadan tys qarqynda paıdalaný jáne jaıylym júktemesin saqtamaý ekologııalyq tepe-teńdikti buzyp otyr. Bul jemshóp kóleminiń tómendeýine ǵana emes, jerdiń tozýyna, erozııanyń artýyna ákelip soqtyrdy», -dedi Senat spıkeri.