182 HQKO jańa jumys formatyna kóshti
ASTANA. 7 qarasha. QazAqparat - Búgingi kúni respýblıkada 182 halyqqa qyzmet kórsetý ortalyǵy jańǵyrtyldy,
dep habarlady QR Premer-Mınıstriniń resmı saıty QR Kólik jáne kommýnıkatsııa mınıstrliginiń baspasóz qyzmetine silteme jasap.
"Jańǵyrtylǵan HQKO-da memlekettik qyzmet kórsetýdiń bıznes-úrdisi ózgertildi, qyzmet kórsetýdiń kedergisiz tásili men biregeı elektrondy kezek engizildi, ǵımarattarǵa jóndeý júrgizildi. Sondaı-aq, Internet nemese call-ortalyqtar arqyly kezekke turý júıesi iske qosyldy", - delingen vedomstvo habarlamasynda.
Klıentterge arnaıy monıtorlar arqyly HQKO qyzmetkerleriniń jumysyn baǵalaý múmkindigi berilgen, bul naqty qyzmetkerdiń memlekettik qyzmet kórsetý sapasy men deńgeıin anyqtaýǵa jaǵdaı jasaıdy.
"Keń ǵımarattarda ornalasqan HQKO-da elektrondyq úkimet buryshy uıymdastyrylǵan. Onda konsýltanttar elektrondyq anyqtama alý, salyqtar men aıyppuldardy onlaın tóleý jáne elektrondyq sandyq qoltańba (ESQ) alýdyń joldaryn túsindiredi", - dep habarlaıdy KKM baspasóz qyzmeti.
Memlekettik qyzmetterdi avtomattandyrý jáne HQKO jumysyn úılestirýdi baqylaý jónindegi Komıtettiń aqparatyna qaraǵanda, qalǵan halyqqa qyzmet kórsetý ortalyqtaryn jańǵyrtý ústimizdegi jyldyń sońyna deıin aıaqtalady.
Esterińizge sala keteıik, respýblıkada HQKO jańǵyrtý Elbasy N.Á.Nazarbaevtyń tapsyrmasy boıynsha júrgizilýde. 2011 jyldyń mamyr aıynda Astana qalasy Almaty aýdanyndaǵy HQKO-da ilki rejimde halyqqa qyzmet kórsetý sapasyn jaqsartý jónindegi joba júzege asyrylǵan. 2011 jyldyń sońyna deıin oblys ortalyqtary men Astana, Almaty qalalaryndaǵy alǵashqy 28 halyqqa qyzmet kórsetý ortalyqtary jańǵyrtyldy.
