181 mln teńge: sýdy zańsyz paıdalanǵandarǵa eseptelgen tólemaqy kólemi jarııalandy
ASTANA. KAZINFORM — Sý resýrstary jáne ırrıgatsııa mınıstrligi resmı saýalymyzǵa joldaǵan jaýabynda sý lımıti belgilengen oblystarda sýdy zańsyz paıdalaný faktilerin anyqtaý sharalary jóninde málimdedi.
Mınıstrlik málimetinshe, «Qazsýshar» RMK Bas prokýratýramen birlesip sý resýrstaryn zańsyz paıdalanýdy anyqtaý jáne jolyn kesý máseleleri jónindegi Jol kartasyn ázirlegen. Ony iske asyrý aıasynda «Qazsýshar» RMK fılıaldarynda sý resýrstaryn zańsyz paıdalanýdyń jolyn kesýge jáne sý paıdalaný tártibiniń saqtalýyn qamtamasyz etýge baǵyttalǵan jumystar uıymdastyryldy.
– Osy maqsatta sý sharýashylyǵy obektilerinde, kanaldarda, gıdrotehnıkalyq qurylystarda jáne sýarmaly jer ýchaskelerinde kóshpeli tekserý jumystary júrgizilip, sý resýrstaryn paıdalanýdyń sharttyq talaptarǵa sáıkestigi zerdelendi, – delingen habarlamada.
Júrgizilgen jumystardyń nátıjesinde «Qazsýshar» RMK boıynsha jalpy 5 533 ga alańdy qamtıtyn 924 zańsyz sý paıdalaný faktisi anyqtaldy.
– Atalǵan faktiler boıynsha qoldanystaǵy tártipke sáıkes 181,2 mln teńge somasynda sý paıdalaný tólemaqysy esepteldi. Onyń ishinde zańsyz sý paıdalaný faktileriniń basym bóligi Túrkistan fılıalyna tirkeldi. Onda 804 fakt esepke alyndy. Tolyǵyraq aıtqanda, Shardara aýdanynda 2 520 ga alańdy qamtıtyn 423 fakt, al Jetisaı jáne Maqtaaral aýdandarynda jalpy 1 890 ga alańdy qamtıtyn 381 fakt boıynsha tıisti materıaldar rásimdeldi, – delingen resmı jaýapta.
Sonymen qatar, D. Qonaev atyndaǵy ÚAK, Batys Qazaqstan, Jambyl, Qyzylorda, Jetisý fılıaldaryn jáne Qanysh Sátpaev atyndaǵy kanal fılıalyn qosa alǵanda, jalpy 120 zańsyz sý paıdalaný deregi anyqtaldy.
– Júrgizilgen tekserý jumystary barysynda sý paıdalaný sharty jasalmaı sý alý, sý resýrstaryn óz betinshe paıdalaný, sondaı-aq, shartta kórsetilmegen daqyldardy ósirý úshin sý paıdalaný faktileri tirkeldi. Atalǵan jaǵdaılar boıynsha tıisti materıaldar rásimdelip, qoldanystaǵy tártipke sáıkes tólemaqy esepteldi. Endi tólemaqyny óndirip alý jóninde talap qoıý jáne sot tártibimen óndirý jumystary júrgizilýde, – dep habarlady mınıstrlik.
Aıta keteıik, buǵan deıin bes ońtústik óńirge sý paıdalaný lımıti bekitilgenin jazǵanbyz.
