1800 týyndy: Mańǵystaýdyń shyǵarmashylyq áleýeti Astanada tanystyryldy
ASTANA. KAZİNFORM - Elordada Creative Aimaq respýblıkalyq jobasy aıasynda Mangystau Creative Days mádenı-kreatıvti kórme-jármeńkesi ashyldy.
Eki kúndik kórmede Mańǵystaýdyń 40-qa jýyq kreatory 1800-den astam avtorlyq ónim men shyǵarmashylyq jobasyn tanystyrady. Al jalpy sharaǵa óńirden 150-ge jýyq adam kelgen.
Kórme Kreatıvti ındýstrııalardy damytý qorynyń Qazaq Creative Hub keńistiginde ótip jatyr. Munda qolóner sheberleri, dızaınerler, sýretshiler, IT mamandary men mádenıet mekemeleriniń shyǵarmashylyq ujymdary bas qosty. Árqaısysy óz salasyndaǵy izdenisi men eńbegin elorda jurtshylyǵyna tanystyrýǵa múmkindik aldy.
— Maqsatymyz – óńir kreatorlarynyń áleýetin tanytyp, eńbegin dáripteý. Olardyń jobalaryn úlken alańdarda kórsetýge jáne ári qaraı damýyna múmkindik berý. Qazir oblysta 200-den astam kreator arnaıy platformaǵa tirkelip, óz jobalaryn júzege asyryp jatyr. Búgingi kórmede Mańǵystaýdyń ereksheligin tanytý úshin alty taqyryptyq aımaq ázirledik. Árqaısysynyń óz ataýy men ıdeıasy bar. Budan bólek, óńir tabıǵatyna arnalǵan «Ybyqty saı » atty arnaıy jasalǵan kórmemizde bar,-dedi Mańǵystaý oblysy mádenıet, tilderdi damytý jáne arhıv isi basqarmasynyń basshysy Nurtas Salı.
Mańǵystaýdyń kreatıvti jármeńkesi mazmuny men usynylǵan týyndylary jaǵynan erekshelenedi. Qabyrǵaǵa ilingen kartınalardan bastap, zergerlik buıymdardyń túr-túri kóz tartady.
Kórmede óńirdiń búgingi shyǵarmashylyq tynysymen qatar, baı tarıhyna da aıryqsha mán berilgen. Munda Mańǵystaý topyraǵynan shyqqan uly tulǵalardyń ómir joly baıandalǵan stendter qoıylǵan. Sondaı-aq olardyń óz zamanynda kıgen shapandary da mýzeı qorynan arnaıy ákelinip, kópshilik nazaryna usynylyp otyr.
Al kórmedegi erekshe týyndylardyń biri – qyshtan jasalǵan bólme shamy. Qarapaıym turmystyq buıymda ulttyq naqysh pen zamanaýı dızaın úılesim tapqan.
— Erekshe buıymdarymyzdyń biri – qumyramen úılestirip jasaǵan sham. Ony zamanaýı stılde ázirledik. Al myna qumyrany órnegimen qosa jasaýǵa eki kún ýaqyt ketti. Aldymen qumyrany jasap, keptiremiz, sodan keıin syrtyna sýret salamyz. Jalpy, buıymnyń jasalý ýaqyty onyń kúrdeliligi men órnegine baılanysty, - dedi kreator Nurdaýlet Qanabaev.
Sheber bul kásipti óńirde alǵashqylardyń biri bolyp qolǵa alǵan. Qumyralaryn jergilikti saz balshyqtan jasaıdy. Tórt jyl ishinde onyń buıymdaryna mańǵystaýlyqtardyń suranysy da arta túsken. Al elordadaǵy kórmege 40-qa jýyq qumyrasyn ala kelgen. Eń qymbat buıymynyń baǵasy – 25 myń teńge.
Jármeńke kelýshilerge tek avtorlyq buıymdardy tamashalap, satyp alýmen shektelmeıdi. Baǵdarlamada sheberlik sabaqtary, sazdy-poetıkalyq kezdesýler men túrli shyǵarmashylyq is-sharalar bar.
Sondaı-aq Mańǵystaýdyń tabıǵaty men mádenı murasynan shabyt alǵan dızaınerlerdiń ulttyq naqyshtaǵy kıim toptamalary kópshilikke usynylady. Kórme aıasynda sán kórsetilimi de ótedi.
Jeksenbi kúni kórme-jármeńkemen qatar kontserttik baǵdarlama uıymdastyrylady. Mańǵystaýdyń ónerpazdary áýelete án shyrqap, kórermenge merekelik kóńil kúı syılaıdy. Sondaı-aq Qazaqstannyń halyq ártisi Tamara Asar óner kórsetedi.
Aıta keteıik, Astanada búgin Aqmola oblysynyń aýyl sharýashylyǵy jármeńkesi de ótip jatyr.
