1800 qazaqstandyq otbasy bala asyrap alý kezeginde tur - Bilim jáne ǵylym vıtse-mınıstri
ASTANA. Qyrkúıektiń 7-si. QazAqparat /Marlan Jıembaı/ - 1800 qazaqstandyq otbasy bala asyrap alý kezeginde tur. Bul týraly búgin Bilim jáne ǵylym vıtse-mınıstri Mahmetǵalı Sarybekov el Parlamenti Senatynyń Áleýmettik-mádenı damý komıtetinde «Qazaqstan Respýblıkasynyń keıbir zańnamalyq aktilerine otbasy úlgisindegi balalar aýyldary jáne jasóspirimder úıleri máseleleri boıynsha ózgerister men tolyqtyrýlar týraly» QR zańynyń jobasyn talqylaýda aıtty.
«Jetim balalardy qamqorlyqqa alǵan ata-analarǵa Úkimet tarapynan qosymsha jalaqy tóleý máselesin qazirgi ýaqytta respýblıkalyq bıýdjettik komıssııanyń qaraýyna engizip otyrmyz. Bizdiń usynysymyz boıynsha ol 30 aılyq eseptik kórsetkishtiń deńgeıinde bolýy kerek. Eger bul másele qabyldanatyn bolsa, onda jetim balalar úılerindegi tárbıelenýshilerdiń sany kúrt ózgeredi», dedi ol óz sózinde.
M.Sarybekovtiń sózine qaraǵanda, memleket tarapynan qosymsha aqsha tólense degen usynysty 6,5 myń balany asyrap alǵan ata-analar jasap otyr eken. Al jalpy elimizde bul sanattaǵy ata-analar sany 25 myńdy quraıdy. Eger mınıstrlik usynysy qabyldanatyn bolsa, onda jyl saıyn respýblıkalyq bıýdjetten 11 mıllıard teńge kóleminde qarjy shyǵyndaýǵa týra kelmek.
Sonymen qatar vıtse-mınıstrdiń atap ótýinshe, qazirgi ýaqytta balalar úılerindegi jetimder sany da jyldan-jylǵa azaıyp kele jatyr. «Óıtkeni qazirgi ýaqytta bala asyrap alýshy qazaqstandyq otbasylar sany artýda. Qazirgi tańda 1800 ata-ana bala asyrap alý kezeginde tur», dedi M.Sarybekov.
