1800-ge jýyq jumysshy elorda kóshelerin qardan tazalap jatyr
NUR-SULTAN. QazAqparat - Keshe túnde Nur-Sultan qalasynan 25 394 tekshe metr qar shyǵaryldy, dep habarlaıdy Elorda Info.
Astanada qar qalyń jaýǵandyqtan, qalanyń kommýnaldyq qyzmeti kúsheıtilgen rejimde jumys isteýde. «Qazgıdromet» RMK-nyń málimetinshe Nur-Sultanda jaýǵan qardyń qalyńdyǵy – 60 sm.
21 jeltoqsannyń túngi aýysymyna 938 tehnıka men 264 jol jumysshysy jumyldyrylyp, qar tıelgen júk kólikteri qala syrtyna 2 116 reıs jasady.
Jalpy, osy ýaqytqa deıin polıgonǵa 79 545 reıs jasalyp, elordadan 954 540 tekshe metr qar shyǵaryldy.
Aıta ketsek, búgingi kúndizgi aýysymǵa 1142 tehnıka men 1 799 jol jumysshysy jumyldyryldy.
Sondaı-aq Almaty qalasynda da qalyń qar túsken. Keshe tústen keıin bastap jaýǵan qardyń qalyńdyǵy 50 santımetrge jetip, mundaıdy sırek kóretin ońtústik astana turǵyndary ábigerge tústi. Búgin saǵat 10.00-degi kórsetkish boıynsha qar qalyńdyǵy 33 sm bolypty. Almaty qalasyn qardan tazartýǵa 551 tehnıka men 356 jol jumysshysy shyqqan.
