$180 mln ınvestıtsııa: Alataýda úı janýarlary azyǵyn óndiretin jańa zaýyt ashylady
VAShINGTON. KAZINFORM — Qasym-Jomart Toqaev Mars kompanııasynyń bas atqarýshy dırektory Pol Vaıraýhty qabyldady, dep habarlaıdy Aqordanyń baspasóz qyzmeti.
Prezıdent Qazaqstannyń Aýyl sharýashylyǵy mınıstrligi men Mars kompanııasy arasynda jalpy somasy 180 mıllıon dollarǵa jýyqtaıtyn ınvestıtsııalyq kelisimge qol qoıylǵanyn quptady.
Memleket basshysynyń pikirinshe, bul ýaǵdalastyq mańyzdy strategııalyq seriktestiktiń bastaýy sanalady jáne Qazaqstan men AQSh arasyndaǵy yntymaqtastyqtyń deńgeıi joǵary ekenin kórsetedi.
Joba aıasynda Mars kompanııasy Alataý qalasynda úı janýarlaryna arnalǵan azyq óndiretin zaýyt salady. Óndiris orny agroónerkásip shıkizatyn tereń óńdeýge jáne qosylǵan quny joǵary taýar óndirýge septigin tıgizedi.
Pol Vaıraýh ózara tıimdi ınvestıtsııalyq kelisimdi júzege asyrýǵa qoldaý kórsetkeni úshin Qasym-Jomart Toqaevqa alǵys aıtty. Ol atalǵan bastama Mars kompanııasynyń óndiristik áleýetin keńeıtýge jáne Ortalyq Azııa men kórshiles aımaqtar naryǵyna ónim shyǵarý kólemin arttyrýǵa múmkindik beretinin jetkizdi.
Budan buryn Qazaqstan AQSh-pen birlesip elde halyqaralyq klınıka salýdy josparlap otyrǵanyn jazǵan bolatynbyz.