180-ge jýyq áskerı Qostanaı oblysyndaǵy orman órtin sóndirýge qolǵabys etti

QOSTANAI. QzAqparat - Alǵashqy kúnnen bastap Qazaqstan Qarýly kúshteriniń áskerı qyzmetshileri órt sóndirýshilermen birge Qostanaı oblysyndaǵy órtti sóndirýge, apattyń odan ári taralmaýyna eleýli kómek kórsetti, dep habarlaıdy QazAqparat.

Qorǵanys mınıstrliginiń málimetinshe, órt sóndirýge elordadan, «Shyǵys» jáne «Astana» óńirlik qolbasshylyqtarynan tıisti áskerı mamandar, daıarlyǵy bar ofıtserler men kelisimshart boıynsha áskerı qyzmetshiler qatarynan 180-ge jýyq áskerı qyzmetshi jumyldyrylǵan.

Olar Áýlıekól aýdanynyń Baǵanaly, Ozernoe jáne Novonejınka eldi mekenderinde qolǵabys etti.

Tilsiz jaýdyń taralýyna jol bermeý maqsatynda ınjenerlik bólimshelerdiń áskerı qyzmetshileri qazanshuńqyr, or qazdy.

Úıindilerdi tazartyp, órt sóndiretin, medıtsınalyq jáne basqa da tehnıkalardyń keıbir qıyn jerlerden ótýi úshin jol saldy.

Órtti aýyzdyqtaýǵa jyldam júretin transheıa, ámbebap jol mashınalary, áskerı ekskavatorlar men BAT-M jol tósegishteri tartyldy.

Budan ózge órt aýdanyna materıaldyq quraldar men jeke quramdy jiberý úshin áskerı-kólik avıatsııasynyń ushaqtary jetkizildi.

Mı-17 jáne Mı-171 tikushaqtary órt aýdanyn barlap, sondaı-aq syrtqy aspada sý aǵyzatyn qurylǵylardy qoldana otyryp, otty tikeleı sóndirdi.

Jumys barysynda armııa avıatsııasynyń ushqyshtary jalyn oshaqtaryna 65 ret jalpy kólemi 175 myń lıtrge jýyq sý shashty.

Óńirdegi jaǵdaı turaqtana bastaǵan soń órt sóndirýge jumyldyrylǵan Qarýly kúsh bólimsheleriniń jeke quramy áskerı bólimderine qaıtyp oraldy.

Foto: gov.kz