18 jyl buryn qurylysy bastalǵan sport bazasy bıyl salynyp bitýi tıis – Ashat Oralov
Mınıstrdiń sózinshe, barlyq halyqaralyq standartqa sáıkes keletin zamanaýı baza Prezıdent Qasym-Jomart Toqaevtyń tapsyrmasy boıynsha salynyp jatyr.
«40 ga aýmaqty alyp jatqan sporttyq bazany shaǵyn Olımpıada qalashyǵy dese de bolady. Munda bir mezette 2 300 adam olımpıadalyq sporttyń 23 túrimen: jeńil jáne aýyr atletıka, voleıbol, basketbol, gandbol, mını-fýtbol, shaıbaly hokkeı, mánerlep syrǵanaý, konkımen júgirý, kórkem jáne sporttyq gımnastıka, boks, jekpe-jek, sonyń ishinde kúrestiń barlyq túri, sý sporty túrlerimen, oq jáne sadaq atý jáne t.b. aınalysa alady. Bazada 9 jabyq sport kesheni bar: bul jeńil atletıka maneji, muz arenasy, kópfýnktsıonaldy sport zaly, gımnastıka jáne aýyr atletıka zaly, 10 jolaqty 50 metrlik olımpıadalyq basseın, jekpe-jek zaly, mergenderge arnalǵan sadaq jáne oq atý alańy, 420 oryndyq qonaq úı, dopıngke qarsy zerthanasy bar medıtsınalyq ortalyq pen basqa da nysandar», - dep jazdy Ashat Oralov.
Baza aýmaǵynda sportpen shuǵyldanyp qana qoımaı, bilim alýǵa, bos ýaqytty paıdaly ári qyzyqty ótkizýge barlyq jaǵdaı jasalady.
«Atap aıtqanda, kitaphana, birneshe konferents zal, boýlıng, sport dúkeni men dámhanalar bolady. Joba shaǵyn jáne orta kásipti damytyp qana qoımaı, 800-ge jýyq adamdy turaqty jumyspen qamtamasyz etedi. Bolashaqta baza aýmaǵynda álem chempıonattarynyń kezeńderin, ýnıversıada, spartakıada syndy halyqaralyq jarystardy ótkizýdi josparlap otyrmyz. Ol úshin munda barlyq múmkindik qarastyrylǵan», - delingen mınıstrdiń jazbasynda.
Ol sondaı-aq keshen qurylysy 2005 jyly bastalǵanyn, alaıda ár jyldary qarjylyq jáne basqa da máselelerge baılanysty qurylys toqtap qalǵanyn málim etti.
«Jospar boıynsha qurylys jyl sońyna deıin aıaqtalýy kerek. Qazir syrtqy ınjenerlik jelilerdi tartý jáne asfalt tóseý sııaqty máseleler sheshilip jatyr. Keńes qorytyndysyna saı jaýapty mekeme basshylaryna qurylysty sapaly aıaqtaý týraly tapsyrma berdim», - dep jazdy Mádenıet jáne sport mınıstri Ashat Oralov.
Eske salsaq, buǵan deıin Ashat Oralov oblystardaǵy sport nysandarynda túgendeý júrip jatqanyn, sondaı-aq bıyl 113 jańa sport nysanyn salý jumystary jalǵasatynyn aıtqan bolatyn.
